သျှမ်းပြည်မြောက်ပိုင်း လားရှိုးမြို့ရှိ လားရှိုးတက္ကသိုလ် နှစ် ၄၀ ပြည့်အခမ်းအနားတရပ်ကို ယနေ့မနက်ပိုင်းက ကျင်းပခဲ့ကြောင်းသိရသည်။
ဂျန္နဝါရီလ ၁၉ ရက်နေ့မနက်ပိုင်းက အခမ်းအနားစတင်ကျင်းပခြင်းဖြစ်ရာ စာရေးဆရာ ဦးဘုန်း (ဓါတု) နှင့် ဆရာလင်းသိုက်ညွန့်တို့မှ စာပေဟောပြောမှုရှိခဲ့ကြောင်းသိရသည်။
“ဒီနေ့တော့ စာပေဟောပြောပွဲရှိတယ်။ မုန့်စျေးတန်းတွေရှိမယ်။ စာအုပ်စာပေ စျေးရောင်းပွဲရှိတယ်။ ညကျရင် ဂီတပွဲရှိမယ်။ ဒီနေ့တော့ သူငယ်ချင်းဟောင်း မိတ်ဆွေဟောင်းတွေနဲ့တွေ့ကြဆုံကြစကားပြောကြတာပေါ့။ ”- ဟု လားရှိုးသား ကျောင်းသားဟောင်း စိုင်းလွယ်က ပြောသည်။
ဂျန္နဝါရီလ ၂၀ ရက်နေ့ စနေနေ့တွင် ဆရာဆရာမ ၁၀၀ ကျော်အား ဆရာကန်တော့ပွဲပြု လုပ်မည်ဖြစ် ကြောင်းလည်း ၄င်းကပြောသည်။
လားရှိုးတက္ကသိုလ်ကို ၁၉၇၉ ခုနှစ် က စတင်ဖွင့် လှစ်ခဲ့သည်။ စတင်ဖွင့်လှစ်စဉ်က လားရှိုး ဒေသကောလိပ်ဟု သာအမည်တွင်ပြီး ထိုနောက်ပိုင်းမှ လားရှိုးကောလိပ်၊ လားရှိုးဒီဂရီကောလိပ်မှယခုလက်ရှိ လားရှိုးတက္ကသိုလ် အဆင့်အထိ တိုးမြှင့်လာခဲ့ပါသည်။