သျှမ်းပြည်နယ် မြောက်ပိုင်းတွင် ဖြစ်ပွားနေသည့် တိုက်ပွဲသည် လက်ရှိ သွားနေသည့် ငြိမ်းချမ်းရေး လုပ်ငန်းစဉ်ကို ထိခိုက်သည် ဟု နိုင်ငံတော် သမ္မတ ရုံး မှ ပြောရေးဆိုခွင့် ရှိသူ ဦးဇော်ဌေး က ပြောဆိုလိုက်သည်။
သြဂုတ် ၂၀ ရက် ၂၀၁၉ ထိုင်းနိုင်ငံ ချင်းမိုင်မြို့ တွင် အမျိုးသား ပြန်လည်သင့်မြတ်ရေး နှင့် ငြိမ်းချမ်းရေး ဗဟိုဌာန( NRPC) အဖွဲ့နှင့် သျှမ်းပြည် ပြန်လည်ထူထောင်ရေး ကောင်စီ ( RCSS/SSA) တို့ နေ့လည် ၂ နာရီ တွင် အလွတ်သဘော တွေ့ဆုံကြပြီးနောက် သတင်းစာရှင်းလင်းပွဲပြုလုပ်ရာတွင် ဦးဇော်ဌေးက ဖြေကြားပြောဆိုခဲ့ခြင်းဖြစ်သည်။
သြဂုတ် ၁၅ ရက်နေ့မှ စတင်ပြီး ညီနောင် မဟာမိတ် (၃)ဖွဲ့သည် သျှမ်းပြည်နယ် မြောက်ပိုင်းနောင်ချိုနှင့် မန္တလေး တိုင်း ပြင်ဦးလွင် နည်းပညာတက္ကသိုလ် (DSTA) အပါအဝင် ၅နေရာကို စစ်ဆင်ရေး ပြုလုပ်ခဲ့သည့်ဖြစ်စဉ်မှာ အကြမ်းဖက် လုပ်ရပ်မှု ဖြစ်ကြောင်း၊ လက်ရှိ ငြိမ်းချမ်းရေး လုပ်ငန်းစဉ်ကို ထိခိုက်ကြောင်း နှင့် အစိုးရ အနေဖြင့် ထိုလက်နက်ကိုင် တိုက်ပွဲသည် ပြသနာကို မဖြေရှင်းနိုင်ကြောင်း ဦးဇော်ဌေး က သျှမ်းသံတော်ဆင့်အား ပြောသည်။
“ မြောက်ပိုင်း ၃ဖွဲ့က ဖြစ်စဉ်ကို ကြည့်ရင် ကျနော်တို့ အစိုးရ အနေဖြင့် နံပတ် ၁ ဒါသည် အကြမ်းဖက် လုပ်ရပ် ဖြစ်တယ်။ နံပတ်၂ သွားနေတဲ့ ငြိမ်းချမ်းရေး လုပ်ငန်းစဉ်ကို ထိခိုက်တယ်။နံပတ် ၃ ကတော့ အစိုးရ အနေနဲ့ ဒီလို မျိုးလက်နက်ကိုင် တိုက်ပွဲတွေနဲ့ ပြသနာတွေ မပြေလည် ဘူးလို့ ခံယူတယ်။ အဲ့အတွက်ငြိမ်းချမ်းရေး တံခါး ဖွင့်ထားတယ်” ဟု ဦးဇော်ဌေး က ဆိုသည်။
အစိုးရ အနေဖြင့် ပဏာမ အပစ်ခတ်ရပ်စဲရေး (Bilateral) အတွက် ကြိုးပမ်းနေကြောင်း၊ အထူးသဖြင့် နိုင်ငံရေး ဆွေးနွေးပွဲ မသွားခင် အပစ်ခတ်ရပ်စဲရေး သွားရန်၊ အစိုးရ အနေဖြင့် တိုက်ပွဲ များရပ်ပြီး မှ နိုင်ငံရေး ဆွေးနွေးပွဲကို ပြုလုပ်ရန် ဖြစ်ကြောင်း ဦးဇော်ဌေး က ပြောသည်။
“ တဖက်မှာလည်း နိုင်ငံရေးမှာ ဆွေးနွေးနေလဲ တဖက်မှာ တိုက်ပွဲ ဖြစ်နေတယ်ဆိုတာက ၂ဖက်လုံး ကျနော်တို့ ပြန်လည် သုံးသပ်ဖို့ လိုပါတယ်” ဟု ဦးဇော်ဌေး က ပြောဆိုလိုက်သည်။
ထို့ပြင် မြောက်ပိုင်းမဟာမိတ် အဖွဲ့ မှ ပြည်ထောင်စု နိုင်ငံရေး တွေ့ဆုံဆွေးနွေးညှိနှိုင်းရေး ကော်မတီ FPNCC မှ ထိပ်ပိုင်းခေါင်းဆောင် များနှင့် တရုတ်အထူးကိုယ်စားလှယ် မစ္စတာ ဆွန်ကော်ရှန် တို့သည် သြဂုတ် ၂၀ ရက်တွင် တရုတ် ပြည်သူသမ္မတနိုင်ငံ ကူမင်း မြို့တွင် တွေ့ဆုံခဲ့ကြောင်း ဦးဇော်ဌေး က ပြောသည်။
“ ဒီနေ့ ပဲ သူတို့ ကူမင်းမှာ တွေ့နေကြပြီလို့သတင်းကြားတယ်။ ဘယ်လို ရလဒ် တွေ ဖြစ်လာမှာလဲ ဆိုတာ မသိဘူး။ တရုတ်ကတော့ ကျနော်တို့အိမ်နီးချင်း နိုင်ငံတွေဖြစ်တယ် ကျနော်တို့နယ်စပ်မျဉ်းတလျောက် တိုင်းရင်းသား လက်နက်ကိုင်တွေနဲ့ထိတွေ့မှုတွေရှိတယ်။ ငြိမ်းချမ်ေးရး အကျိုးဆောင် အနေနဲ့ တရုတ်အခန်းကဏ္ဍကို ကျနော်တို့ အလေးထားတယ်” ဟု ဦးဇော်ဌေး က ပြောသည်။
သြဂုတ် ၂၀ ရက် ၂၀၁၉ ထိုင်းနိုင်ငံ ချင်းမိုင်မြို့ တွင် အမျိုးသား ပြန်လည်သင့်မြတ်ရေး နှင့် ငြိမ်းချမ်းရေး ဗဟိုဌာန( NRPC) အဖွဲ့နှင့် သျှမ်းပြည် ပြန်လည်ထူထောင်ရေး ကောင်စီ ( RCSS/SSA) တို့ သည် နေ့လည် ၂နာရီ တွင် အလွတ်သဘော တွေ့ဆုံကြသည်။
ထိုတွေ့ဆုံမှု သည် အဓိက ငြိမ်းချမ်ေးရ းလုပ်ငန်းစဉ် ယာယီရပ်ဆိုင်းရပ်နေသည့်အကြောင်း၊ ယာယီအားဖြင့် တဘက်နှင့် တဘက် ပြန်လည် သုံးသပ်ပြီး ပိုမို ကောင်းမွန်အောင် လုပ်ငန်းများဖြစ်အောင် ဆွေးနွေးခြင်း နှင့် ၂၁ ပင်လုံ ငြိမ်းချမ်းရေး ရလဒ်ကောင်းများ အတွက် ဆွေးနွေးကြကြောင်း သိရသည်။
