မွန်ပြည်သစ်ပါတီ NMSP နှင့် လားဟူဒီမိုကရက်တစ်အစည်းအရုံး LDU တို့ တနိုင်ငံလုံးပစ်ခတ် တိုက်ခိုက်မှုရပ်စဲရေးစာချုပ်လက်မှတ်ရေးထိုးသည့်အခမ်းအနားသို့ အသိသက်သေ အဖြစ် တက်ရောက်လာသည့် တရုတ်နိုင်ငံ အာရှ ရေးရာ အထူးကိုယ်စားလှယ် မစ္စ တာဆွန်ကော်ရှန်အား NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့ ၈ ဖွဲ့၏ ငြိမ်းချမ်းရေးလုပ်ငန်း စဉ်ဆိုင်ရာအလုပ်အဖွဲ့ PPWT တို့တွေ့ဆုံခဲ့ကြကြောင်းသိရသည် ။
ဖေဖော်ဝါရီလ ၁၂ ရက်နေ့က ရန်ကုန်မြို့ရှိ တရုတ်သံရုံးတွင် တွေ့ဆုံခဲ့ခြင်းဖြစ်ပြီး မြန်မာ့ငြိမ်း ချမ်းရေးလုပ်ငန်းစဉ်မှ တိုင်းရင်းသားများကြုံတွေ့နေရသည့်အခြေအနေများကို ဆွေးနွေးမေးမြန်း ခဲ့ကြောင်း သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA မှ အတွင်းရေးမှူး ၃ ဗိုလ်မှူးကြီးစိုင်းငင်းကပြောဆိုသည်။
သူက မြန်မာ့ငြိမ်းချမ်းရေးလုပ်ငန်းစဉ်မှာ တိုင်းရင်းသားတွေဘက်က ဘယ်လိုအခက်အခဲရှိသလဲ။ ဘယ်လိုကူညီပေးရမလဲစတာတွေကိုမေးမြန်းတယ်။ ကျနော်တို့ဘက်ကလည်း ပြန်လည် ဆွေးနွေး တယ်။ အဲတာအပြင် သျှမ်းပြည်မြောက်ပိုင်းနဲ့ကချင်ပြည်နယ်ဘက်မှာ မြောက်ပိုင်းမဟာမိတ် တပ်ဖွဲ့တွေကို အစိုးရတပ်မတော် က ထိုးစစ်ဆင်တိုက်ခိုက်နေမှုကြောင့် စစ်ဘေးရှောင်လူထုများပြား လာနေတယ်။ အဲဒီအတွက် အမြန်ဆုံးရပ်တန့်ပေးနိုင်ဖို့ မြန်မာအစိုးရနဲ့ဘဲဖြစ်ဖြစ် တပ်မတော်နဲ့ဘဲဖြစ်ဖြစ်တွေ့ဆုံရင် ပြောပေးဖို့ မစ္စ တာဆွန်ကော်ရှန်ကိုကျနော်တို့အဖွဲ့က တင်ပြတယ် – ဟု ဗိုလ်မှူးကြီးစိုင်းငင်းက သျှမ်းသံတော်ဆင့်အားပြောပြသည်။
မြောက်ပိုင်းမဟာမိတ်တပ်ဖွဲ့အား ငြိမ်းချမ်းရေး လုပ်ငန်းစဉ်တွင် ပါဝင်လာရေး ကူညီပေးရန် လည်း တောင်းဆိုခဲ့သည့်အပြင် ရခိုင်ပြည်နယ်အရေး ၊ NCA အရ အမျိုးသားအဆင့် နိုင်ငံရေးဆွေး နွေးပွဲ များကို သျှမ်းနှင့် ရခိုင် တို့၌ မကျင်းပနိုင်သေးခြင်း ကိစ္စတို့ ကိုပါ ဆွေးနွေးခဲ့သည်ဟုဆိုပါသည်။
တရုတ်ကိုယ်စားလှယ်ဘက် ကလည်း မြန်မာ့ငြိမ်းချမ်းရေးဖြစ်စဉ်ကို စိတ်ဝင်စားမှုရှိကြောင်း ဖော်ပြပြီးအမြဲတမ်းအားပေးကူညီမည်ဟု တုံ့ပြန်ကြောင်း ၎င်းက ရှင်းပြသည်။
တရုတ်နိုင်ငံ အာရှ ရေးရာ အထူးကိုယ်စားလှယ် မစ္စ တာဆွန်ကော်ရှန်အား တွေ့ဆုံသည့် အပစ်ရပ် ၈ ဖွဲ့မှ PPWT ကိုယ်စားလှယ်များမှာ KNU အထွေထွေအတွင်းရေးမှူး ပဒိုစောတာဒိုမှူး၊ RCSS/SSA အတွင်းရေးမှူး ၃ ဗိုလ်မှူးကြီး စိုင်းငင်း၊ ALP ၏ ဗဟိုကော်မတီဝင် ဒေါ်စောမြရာဇာလင်း၊ CNF အတွင်းရေးမှူး ဆလိုင်းထလာဟေး တို့ဖြစ်ကြောင်းသိရပါသည်။
