မိုင်းကိုင်ကျောက်မီးသွေးတူးဖော်ဖို့ ကုမ္မဏီတွေ့ဆုံညှိနှိုင်းမှုအား သျှမ်းပြည်နယ်လွှတ်တော်၏ စီစစ်ရေးကော်မတီမှပယ်ချ

0

သျှမ်းပြည်တောင်ပိုင်း မိုင်းကိုင်မြို့နယ် ကျောက်မီးသွေးတူးဖော်ရေး စီမံကိန်းအား သျှမ်းပြည်နယ် လွှတ်တော်၏ စိစစ်ရေးကော်မတီ အဖွဲ့ ၄ ဖွဲ့ ကွင်းဆင်းစစ်ဆေးရာတွင် ကျောက်မီးသွေး တူးဖော်မည့် ဟိန်းမေတ္တာ ကုမ္ပဏီ ပိုင်ရှင် က ကော်မတီအဖွဲ့အား တွေ့ဆုံ ဆွေးနွေးခဲ့ကြောင်း သိရသည်။

ဖေဖော်ဝါရီ ၅ ရက်နေ့က သျှမ်းပြည်တောင်ပိုင်း တောင်ကြီးမြို့၌ ဟိန်းမေတ္တာ ကုမ္ပဏီပိုင်ရှင် နှင့်အတူ ကုမ္ပဏီ CEO တို့က မိုင်းကိုင်မြို့ရှိ ကျောက်မီးသွေး တူးဖော်မည့်ကိစ္စ ကွင်းဆင်းလေ့လာသည့် ကော်မတီ များအားတွေ့ဆုံခဲ့ခြင်းဖြစ်သည်။

“ကုမ္မဏီက ‘ လွှတ်တော်ကိုယ်စားလှယ်တွေ အနေနဲ့ ကြားနေပြီးတော့ ညှိနှိုင်းပေးဖို့ ’ ဆိုပြီး စကားလာပြောတယ်၊ ကျနော်တို့သည် လွှတ်တော်က တာဝန်ပေးလို့ ကွင်းဆင်းစစ်ဆေးတာ။ ပြည်သူတွေ လက်မခံတဲ့ ကိစ္စ ၊ အမှန် အတိုင်း ၊ အရှိ ကို အရှိတိုင်း၊ အမြင်ကို အမြင်တိုင်း လွှတ်တော်ကို တင်မယ် ။ လွှတ်တော်ကိုယ်စားလှယ်နဲ့ ပြည်သူတွေကို ဖြောင့်ဖျပြီး ပြောပေးပါ ဆိုပြီး ကုမ္မဏီကနေပြောလာတာတွေက ကျနော်တို့ လုပ်လို့မရဘူး” ဟု မိုင်းရှုးလွှတ်တော်ကိုယ်စားလှယ် အမှတ်(၁) သျှမ်းပြည်နယ်လွှတ်တော်မှာ သဘာဝသယံဇာတ နှင့် လျှပ်စစ်ရေးရာကော်မတီ အတွင်းရေးမှူး စိုင်းလင်းမြတ် ကပြောသည်။

ပြီးခဲ့သည့် ဒီဇင်ဘာလ နောက်ဆုံးပတ်က သျှမ်းပြည်နယ် လွှတ်တော် ဥက္ကဌ မှ တစ်ဆင့် သျှမ်းပြည်နယ် စိစစ်ရေး ကော်မတီ မှ တိုင်ကြားစာ စိစစ်ရေးကော်မတီ၊ တရားဥပဒေစိုးမိုးရေး ကော်မတီ ၊ သဘာဝသယံဇာတ နှင့် လျှပ်စစ်ရေးရာ ကော်မတီ နှင့် မြေယာစိစစ်ရေးကော်မတီ ကော်မတီ ၄ ခု တို့ မိုင်းကိုင်မြို့နယ် ကျောက်မီးသွေးတူးဖော်မည့် နေရာကို ကွင်းဆင်းစစ်ဆေးခဲ့သည်။

“ကျနော်အမြင်ဆိုရင် ကုမ္ပဏီ ဘက်က တူးချင်တယ် ၊ တူးခွင့်ရအောင်လည်း သူတို့ဘက် ကြိုးစားနေမယ်လို့ မြင်တယ်၊ ကျနော်ကတော့ ပွင့်ပွင့်လင်းလင်းပြောလိုက်တယ်၊ သဘာဝပတ်ဝန်းကျင် ဒီထင်းရှုးတောကတော့ ကုန်မှာပဲ ။ စဉ်းစားကြပေါ့ လုပ်သင့် မလုပ် ၊ လုပ်ကွက်ကလည်း ၄၉.၅ ဧက ဆွဲထားတာက ၄ ကွက်တွဲ ဧက ၂၀၀ နီးပါးလောက်ဖြစ်သွားတယ် အကြီးကြီးဖြစ်သွားတယ်” ဟု သျှမ်းပြည်နယ်လွှတ်တော် သဘာဝသယံဇာတ နှင့် လျှပ်စစ်ရေးရာကော်မတီ အတွင်းရေးမှူး စိုင်းလင်းမြတ် ကပြောသည်။

မိုင်းကိုင်မြို့နယ်ရှိ ကျောက်မီးသွေးတူးဖော်ရေး ကိစ္စ နှင့်ပတ်သက်ပြီး ကွင်းဆင်းစစ်ဆေးပြီး တွေ့ရှိချက်များ၊ အကြံပြုချက်များကို သျှမ်းပြည်နယ်လွှတ်တော်ဥက္ကဌမှ တစ်ဆင့် အစီရင်တင်ထားပြီး ဖြစ်ကြောင်း သိရသည်။

သျှမ်းပြည်တောင်ပိုင်း မိုင်းကိုင်မြို့နယ်အတွင်း နယ်မြေဧက ၁၀၀၀ ကျော်၌ ကျောက်မီးသွေးတူးဖော် ရန် ပြည့်အောင်ဟိန်းနှင့် ဟိန်းမေတ္တာ ကုမ္မဏီ ၂ ခုက နေပြည်တော်အစိုးရ ထံ ၂၀၁၄ ခုနှစ်ကခွင့်ပြုချက်ရရှိထားပြီးဖြစ်ကြောင်း ကုမ္မဏီက ဒေသခံလူထုအား ပြောဆိုသည်ဟု သိရပါသည်။

SHARE

LEAVE A REPLY

Please enter your comment!
Please enter your name here