သမိုင်းဝင်ပင်လုံတွင် NLD လူငယ်များ ၇၁ ကြိမ်မြောက်ပြည်ထောင်စုနေ့အခမ်းအနား ဦးဆောင်ကျင်းပမည်ဟူသည့် အပေါ် အိမ်ရှင်လူငယ်များအား အသိပေးအကြောင်းကြားခြင်းမရှိသေးဟုဆို

0

သျှမ်းပြည်တောင်ပိုင်း လွယ်လင်ခရိုင် ပြည်ထောင်စုသန္ဓေတည်ရာ ပင်လုံမြို့ရှိ ပင်လုံကျောက်တိုင်တွင် NLD လူငယ် ၇ သောင်းက ၇၁ ကြိမ်မြောက်ပြည်ထောင်စုနေ့ ဦးဆောင်ကျင်းပမည်ဟူသည့် သတင်းများ ထွက်ပေါ်နေသည့် အပေါ် ဒေသခံများအား တရားဝင်အကြောင်းကြားခြင်းမရှိသေးကြောင်း ပင်လုံဒေသခံများကပြောသည်။

ဂျန္နဝါရီလ ၃၁ ရက်နေ့က နေပြည်တော်ရှိ ဒုတိယအကြိမ် ညီလာညီလာခံကျင်းပရေး ဗဟိုကော်မရှင်၊ ဗဟိုလုပ်ငန်း ကော်မတီ (CWC) နှင့် ပြည်နယ်/တိုင်း ကော်မရှင် ဒုတိအကြိမ် တွေ့ဆုံပွဲအပြီး လူငယ် ညီလာခံ ကျင်းပရေး ဗဟိုကော်မရှင် ဥက္ကဋ္ဌ ဦးမောင်မောင်ဦး က- ရ၁ နှစ်မြောက် ပြည်ထောင်စုနေ့ အခမ်းအနားကို အမျိုးသား ဒီမိုကရေစီ အဖွဲ့ချုပ် (NLD) ပါတီ၏ လူငယ် ရ သောင်းကျော်က ကြီးမှူးပြီး ပင်လုံမြို့တွင် ပြုလုပ်သွားမည် ဖြစ်ကြောင်း ပြောသည်ဟု ဧရာဝတီသတင်းဌာနတွင်ဖော်ပြထားသည်။

“ပြည်ထောင်စုနေ့ကို NLD ပါတီလူငယ်တွေကနေ ဦးဆောင်ကျင်းပသွားမယ်ဆိုတဲ့သတင်းတွေ ထွက်နေပေမယ့် ခုထိပြင်ဆင်တာမတွေ့ရသေးသလို ဒီက ရပ်မိရပ်ဖတွေကိုလည်း အကြောင်းမကြားသေးဘူး။ လာလည်းမဖိတ်သေးဘူး။ ဒေသခံတွေအနေနဲ့ မသိရသေးဘူး။ ပါတီကနေဦးဆောင်ကျင်းပမည့် ပြည်ထောင်စုနေ့အခမ်းအနားလား၊ အစိုးရကနေဦးဆောင်ကျင်းပမယ့် ရ၁ ကြိမ်မြောက်ပြည် ထောင်စုနေ့အခမ်းအနားလားဆိုတာလူထုကို ရှင်းရှင်းလင်းလင်း အကြောင်းကြားအသိပေး သင့်တယ်လို့မြင်ပါတယ်။” – ဟုပင်လုံမြို့ခံ လူငယ်ခေါင်းဆောင်စိုင်းဆု က သျှမ်းသံတော်ဆင့်အားပြောပြသည်။

ပြီးခဲ့သည့် ဒီဇင်ဘာလက သျှမ်းအမျိုးသားအဆင့် ND ကျင်းပရေးအတွက် ကျင်းပရေးကော်မတီဝင် လူငယ်များက ပင်လုံမြို့တွင်ဒေသခံလူထုနှင့်တွေ့ဆုံစဉ် အစိုးရတပ်မတော်၏ တားမြစ်ကန့်သတ်ခြင်း ခံခဲ့ရသည်။

“အခု NLD လူငယ်ကနေဦးဆောင်ပြီး လုပ်မယ်ဆိုတော့ထူးခြားချက်တခုဖြစ်တယ်။ ကျနော်တို့ သျှမ်း ND အတွက်လုပ်တုန်းက အတားခံရတာဟာ တပ်မတော်ကို အစိုးရကမလွန်ဆန်နိုင်လို့ အဲလိုဖြစ်သွားတာ လည်းဖြစ်နိုင်ပါတယ်။ အခု ပြည်ထောင်စုနေ့အခမ်းအနားလုပ်မယ်ဆိုတာက ပြည်ထောင်စုသား အားလုံးနဲ့ဆိုင်တာမို့ ဒီသမိုင်းဝင်အမှတ်အသားဖြစ်တဲ့နေရာကတော့ ဘယ်သူမဆိုလာပြီးလုပ်နိုင်တယ်။ ဒါပေမယ့် ပါတီရဲ့နာမည်ကိုသုံးပြီးတော့ ပါတီအနေနဲ့ဘဲလုပ်သွားရင်တော့မကောင်းဘူး။ အစိုးရကနေ ဦးဆောင်ပြီးတော့ အစိုးရရဲ့နာမည်နဲ့ဘဲလုပ်သွားသင့်တယ်။ ပြီးခဲ့တဲ့ အစိုးရလက်ထက်ကလည်း ကြ့ံခိုင်ရေးပါတီအမည်မသုံးခဲ့ဘူး။ သျှမ်းပြည်နယ်အစိုးရနာမည်နဲ့ဘဲ သုံးသွားပါတယ်။ ”- ဟု စိုင်းဆုက ဆက်လက်ပြောပြသည်။

ပင်လုံကျောက်တိုင်တွင် ကျင်းပမည့် ပြည်ထောင်စုနေ့အခမ်းအနားနှင့်ပတ်သက်ပြီး တိုင်းရင်းသားစည်းလုံးညီညွတ်ရေး၊ ငြိမ်းချမ်းရေးအတွက် အိမ်ရှင်ဖြစ်သော ဒေသခံလူငယ်များ ကြိုတင်အသိပေးအကြောင်းကြားသင့်ကြောင်း ယခင်က သျှမ်းလူငယ်အဖွဲ့အားဦးဆောင်ခဲ့ဖူးသည့် လားရှိုးခရိုင်အမျိုးသားလွှတ်တော်ကိုယ်စားလှယ် စိုင်းဝမ်းလျန်းခမ်းက ဤကဲ့သို့ပြောပါသည်။

“တောင်တန်း-ပြည်မ ပူးပေါင်းရေးကျောက်တိုင်မှာ ပြည်ထောင်စုလုံးဆိုင်ရာတိုုင်းရင်းသားလူငယ်များ ညီလာခံက အစောဆုံးကျင်းပ သွားခဲ့ဖူးပါတယ်။ ပြည်နယ်အစိုးရက ဆိုင်းငံ့ထားပါလို့တောင် တိုင်းရင်းသားလူငယ်ညီလာခံကို ဟန့်တားခဲ့ပေမယ့် မကြောက်မရွံ့ တိုင်းရင်းသားလူငယ်ခေါင်းဆောင်များက ရဲဝ့ံစွာ ရင်ဆိုင်ပြီး ညီလာခံကို အောင်မြင်စွာကျင်းပ ဖြတ်သန်းလာခဲ့ပြီမို့ အခုတော့ လူတွေလည်း သိလာကြပြီး ကျောက်တိုင်မှာဘာပွဲပဲလုပ်လုပ် လွယ်ကူသွားတဲ့သဘောပေါ့ဗျာ။ ဒါပေမယ့် ပင်လုံကျောက်တိုင်မှာ ဘာပွဲပဲ ကျင်းပပါစေ ပင်လုံဒေသခံတိုင်းရင်းသားလူငယ်များကိုတော့ အသိပေးဖိတ်ကြားရင် ကောင်းမယ်လို့တော့မြင်ပါတယ်။ ပူးပေါင်းပါဝင်နိုင်ခြင်းကတော့ သူတို့အင်အား နည်းများပေါ်မူတည်တာပေါ့။ ယဉ်ကျေးမှုအရ အိမ်ရှင်ဖြစ်တဲ့ တိုင်းရင်းသားလူငယ်များကို အသိအမှတ်ပြုတဲ့ သဘောပေါ့ဗျာ။”

ယမန်နှစ်က ကျင်းပသော ပြည်ထောင်စုနေ့အခမ်းအနားတွင်မူ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တက်ရောက်ကာ လူငယ်များနှင့်ငြိမ်းချမ်းရေးစကားဝိုင်းပြုလုပ်ခဲ့သည်။

ယခုနှစ်တွင်မူ ဒေါ်အောင်ဆန်းစုကြည်ကိုယ်တိုင်တက်ရောက်မည်မတက်ရောက်မည်ကို မသိရသေးဟုလည်း ဆိုပါသည်။

SHARE

LEAVE A REPLY

Please enter your comment!
Please enter your name here