CSSU နှစ်ပတ်လည်အစည်းအဝေးကျင်းပပြီးစီး အလှည့်ကျဥက္ကဌတာဝန်အား ကျားဖြူပါတီသို့ ပေးအပ်

0

သျှမ်းပြည်တောင်ပိုင်း လင်းခေးခရိုင် မိုင်းပန်မြို့နယ်အတွင်းရှိ RCSS/SSA ဌာနချုပ်လွယ်တိုင်းလျန်းတွင် သျှမ်းပြည်ညီညွတ်ရေးကော်မတီ CSSU နှစ်ပတ်လည်အစည်းအဝေးကျင်းပရာ အလှည့်ကျဥက္ကဌအဖြစ် သျှမ်းတိုင်းရင်းသားများဒီမိုကရက်တစ်ပါတီ SNDP (ကျားဖြူပါတီ) အား ပေးအပ်လိုက်သည်။

ဖေဖော်ဝါရီလ ၁ ရက်နေ့ နှင့် ၂ ရက်နေ့တွင် ကျင်းပသည့် အစည်းအဝေးတွင် ဥက္ကဌတာဝန် လွဲပြောင်းပေးအပ်လိုက်ခြင်းဖြစ်ပြီး အချက် ၃ ချက်ပါ ကြေငြာချက်တစောင်ကိုပါ ထုတ်ပြန်လိုက်သည်။

ကြေငြာချက်တွင် CSSU ၏ ၂၀၁၈ ဥက္ကဌ အဖြစ် SNDP ကျားဖြူပါတီအားလွဲပြောင်းပေးလိုက်ကြောင်း ၊ ရှေ့ဆက်ငြိမ်းချမ်းရေးရရှိရေးအတွက် CSSU အဖွဲ့ဝင်များ လက်တွဲဆောင်ရွက်သွားမည်ဖြစ်ကြောင်း ပါရှိပါသည်။

ဖေဖော်ဝါရီလ ၂ ရက်နေ့က လက်ရှိဥက္ကဌတာဝန်ယူထားသည့် RCSS/SSA ခေါင်းဆောင် ဗိုလ်ချုပ်ကြီးယွက်စစ်က ဥက္ကဌအလှည့်ကျတာဝန်ကျ ကျားဖြူပါတီအား လွဲပြောင်းပေးရာတွင် ကျားဖြူပါတီ ဥက္ကဌ စိုင်းအိုက်ပေါင်းကိုယ်စား အစည်းအဝေးတက်ရောက်လာသည့် ကျားဖြူပါတီ အတွင်းရေးမှူး စိုင်းဘိုးအောင်က လက်ခံတာဝန်ယူထားကြောင်းသိရသည်။

၄င်းနှင့်ပတ်သက်ပြီး စိုင်းဘိုးအောင်က – တကယ်တော့ CSSU ရဲ့ ဥက္ကဌ ရာထူးက ပါတီ သို့မဟုတ် အဖွဲ့အစည်းထူထောင်သူကလာပြီးလက်ခံရပါမယ်။ ဒါပေမယ့်ကျနော်တို့ဥက္ကဌက ကျန်းမာရေးအခြေအနေ ကြောင့် အစည်းအဝေးမလာနိုင်လို့ ကျနော် စိုင်းဘိုးအောင်ကနေ ကိုယ်စားလာပြီးလက်ခံပေးတာပါဘဲ။ ကျနော်ကနေ ဥက္ကဌကြီးဆီကိုပြန်သွားအပ်ပေးပါမယ်။ ဥက္ကဌကြီးကနေ တာဝန်ယူဆောင်ရွက်သွားမှာဖြစ်တယ် ။ အရင်က အဖွဲ့အစည်းရဲ့လက်တွဲဆောင်ရွက်ချက်တွေဟာ အားနည်းတာတွေဘာတွေရှိရင်ရှိမယ်။ ရှေ့ဆက်မှာတော့ ဒီထက်ပိုကောင်းလာအောင် ကြိုးစားဆောင်ရွက်သွားပါမယ်။ – ဟု သျှမ်းသံတော်ဆင့်အားပြောသည်။

အစည်းအဝေးသို့ CSSU အဖွဲ့ဝင်အဖွဲ့များ တက်ရောက်ခဲ့ပြီး အစည်းအဝေးပထမရက်တွင် CSSU ၏ လုပ်ငန်းဆောင်တာများကိုပြန်လည်သုံးသပ်ခြင်း၊ ငွေစရင်းရှင်းတမ်းပြုလုပ်ခြင်း၊ လုပ်ငန်းဆောင် တာများအတွင်း အားနည်းချက်များကိုသုံးသပ်ခြင်းနှင့် ကော်မတီ၏ရည်ရွယ်ချက်တချို့ ကိုပြန်လည်ပြင်ဆင်ခြင်းများပြုလုပ်ခဲ့ကြောင်းသိရသည်။

CSSU အဖွဲ့ဝင် SSJAC ကိုယ်စားလှယ် ( SNLD ပါတီအတွင်းရေးမှူး) စိုင်းလိတ်က – CSSU ဥက္ကဌတာဝန်ကို ကျားဖြူပါတီကို ပေးအပ်တဲ့အပေါ် SSJAC အနေနဲ့ ဘာမှကန့်ကွက်စရာမရှိပါဘူး။ အဖွဲ့အစည်းရဲ့ မူအတိုင်း ပါဘဲ။ ၂၀၁၈ ခုနှစ်ဖြတ်သန်းမှုမှာ ဘယ်လိုအခက်အခဲတွေကြားကဘဲဖြတ်သန်းခဲ့ရပါစေ ရှေ့ဆက်ခရီးမှာလည်း ကျနော်တို့အတွင်းရေးမှူးများအဖွဲ့ကနေတတ်နိုင်သမျှ ကူညီထမ်းရွက်သွားပါမယ်- ဟု ပြောဆိုခဲ့သည်။

သျှမ်းပြည်ညီညွတ်ရေးကော်မတီ CSSU တွင် သျှမ်းတိုင်းရင်းသားများဒီမိုကရေကရက်တစ်ပါတီ SNDP ၊ သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA ၊ သျှမ်းပြည်ပူးပေါင်း ဆောင်ရွက်ရေးကော်မတီ SSJAC (သျှမ်းတိုင်းရင်းသားများဒီမိုကရေစီအဖွဲ့ချုပ် SNLD ၊ သျှမ်းပြည် တိုးတက်ရေးပါတီ SSPP/SSA ) ၊ သျှမ်းလူမှုအခြေပြုအဖွဲ့အစည်း Shan CBOs တို့ဖြင့်စုပေါင်းဖွဲ့စည်း ထားသည်။ ထိုနောက်ပိုင်း သျှမ်းပြည်အရှေ့ပိုင်း ဒီမိုကရက်တစ်ဖွံ့ဖြိုးတိုးတက်ရေးပါတီ ESSDDP၊ သျှမ်းပြည်မျိုးဆက်သစ်များအဖွဲ့ NGSS ၊ သျှမ်းလူငယ်အဖွဲ့ TYO ၊ ထိုင်းနိုင်ငံရှိ သျှမ်းအမျိုးသားများအဖွဲ့ TNAT တို့ပါ၀င်ပူးပေါင်းလာခဲ့သည်။

၂၀၁၃ ခုနှစ် နှောင်းပိုင်းက စတင်ဖွဲ့စည်းလာသည့် CSSU ၏ ရည်ရွယ်ချက်မှာ သျှမ်းပြည်တွင်းလူထု ၏ အခွင့်အရေးများကိုကာကွယ်ရန်ဖြစ်ပြီး၊ သျှမ်းပြည် သူလူထု မိမိကံကြမ္မာ မိမိဖန်တီးနိုင်ရန်၊ နိုင်ငံရေးဆွေးနွေးရေးအတွက် နိုင်ငံရေးမူဘောင်စုပေါင်းပြင် ဆင်ရန်အတွက် စသည်တို့ဖြစ်ပါသည်။

SHARE

LEAVE A REPLY

Please enter your comment!
Please enter your name here