RCSS/SSA ၏ ဆက်ကြေးကောက်အဖွဲ့ဟုဆိုကာ အစိုးရတပ်မတော်လိုက်လံပစ်ခတ် တဦးသေ

0

သျှမ်းပြည်မြောက်ပိုင်း သီပေါမြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA ၏ ဆက်ကြေးကောက်အဖွဲ့ဟုဆိုကာ အစိုးရတပ်မှ ပစ်ခတ်မှုတွင် တဦး အသေဖမ်းဆီးရမိသည်ဟု အစိုးရတပ်မတော် သတင်းက ထုတ်ပြန်ထားသည်။

ဂျန္နဝါရီလ ၂၅ ရက်နေ့က ညနေပိုင်းက သီပေါမြို့နယ် ကျောက်မဲ-သီပေါအသွား ပြည်ထောင်စုကား လမ်း မဘေး ဘော်ကြိုကျေးရွာအရှေ့မြောက်ဘက်တမိုင်ခွဲခန့်အကွာတွင် လက်နက်ကိုင်လူ ၂ ဦး အား အစိုးရတပ်မတော်မှ ပစ်ခတ်တိုက်ခိုက်ရာ ၁ ဦးနေရာတွင်ပွဲချင်းပြီးသေဆုံးပြီး ၁ ဦးမှာထွက်ပြး လွှတ်မြောက်သွားကြောင်း နေပြည်တော်က သတင်းထုတ်ပြန်ထားသည်။

ဒေသခံများကမူ အဆိုပါအရပ်ဝတ် လက်နက်ကိုင် အဖွဲ့ ၅ ဦးရှိကြောင်း၊ စောင့်ဆိုင်းပိုက်ဆံကောက်သည့် ပုံစံမဟုတ်ဘဲ နွားကုန်ကူးအုပ်စုများနောက် ၄င်းတို့ လိုက်သွားနေစဉ် အစိုးရတပ်မတော် စစ်ကြောင်း နှစ်ခု က ၄င်းတို့အားလိုက်လံတိုက်ခိုက်ရာမှ အပြန်အလှန်ပစ်ခတ်မှုဖြစ်ပွားကြောင်းဒေသခံများကပြောသည်။

“တပ်ကစစ်အင်အားဖြည့်ပြီး လိုက်လံရှာဖွေနေတယ် သူတို့ကို။ ဘယ်အဖွဲ့လဲ ဆိုတာ ကျနော်တို့လဲ မသိဘူး။ တွေ့တဲ့သူတွေပြောတာကတော့ သူတို့ ၅ ယောက်ရှိတယ်။ တယောက်သေတယ်။ ၄ ယောက် လွတ်မြောက်သွားတယ်။ သေဆုံးသူရဲ့အလောင်းကိုလည်း နယ်စည်းမခြားပရဟိတသီပေါအဖွဲ့ကနေ ကျောက်မဲမြို့ကို ပို့လိုက်ပြီ ”- ဟု သီပေါမြို့ခံ စိုင်းအိုက်အောင် ကပြောသည်။

ပြည်ထောင်စုလမ်းမကြီးမှ လက်နက်ကိုင်လူ ၂ ဦးအား လိုက်လံပစ်ခတ်သည့်အစိုးရတပ်မတော်မှာ ကျောက်မဲအခြေစိုက် ၅၀၁ နှင့်သီပေါအခြေစိုက် ခလရ ၂၃ ပူးပေါင်းတပ်ဟု သိရပြီး သီပေါမြို့အနောက်ဘက် ၁ မိုင်ခန့်အကွာ တွန်တီးရွာအနီး မန့်ဟိုင်းအုပ်စု တွန်ခေါ့ရွာတွင်ပစ်ခတ်မှုဖြစ်ပွါးခဲ့ခြင်းဖြစ်သည်ဟုသိရသည်။

အဆိုပါပစ်ခတ်မှုတွင် တွန်ခေါ့ရွာသားများ၏ နေအိမ်အားလည်း ကျည်ဆန်ထိမိပျက်စီးမှုရှိကြောင်း စိုင်းအိုက်အောင်က ပြောသည်။

သို့သော် RCSS/SSA အားသျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း အသေးစိပ် အချက် အလက်မသိရသေးဟုသာပြောဆိုတုန့်ပြန်ခဲ့သည်။

ဒေသအတွင်း တာဝန်ရှိတပ်မှူးကတော့ – “ကျနော်တို့တွေက ဆက်ကြေးကောက်ခံရတဲ့အဆင့်မဟုတ်ဘူးဗျ။ ဒီဒေသဘက်မှာကျနော်တို့ရောက်ရှိတယ်လို့ သိတာနဲ့ လူထုက ထောက်ခံအားပေးပြီးသား၊ ဒီဘက်ပိုင်းမှာ ကျနော်တို့က အစိုးရတပ်ကော၊ TNLA တပ်ကော သတိထားရတယ်၊ ဦးသူပစ်တဲ့အဆင့်ဖြစ်နေပြီ ”- ဟု ပြောသည်။

အစိုးရတပ်မတော်နှင့် သျှမ်းပြည်တပ်မတော် RCSS/SSA သည်တနိုင်ငံလုံးအပစ်အခတ်ရပ်စဲရေး စာချုပ် လက်မှတ်ရေးထိုးထားသော်လည်း နှစ်ဘက်လုံး အပြန်အလှန်အပြစ်ပုံချမှု၊ ပစ်ခတ်မှု တို့ကြောင့် ရွာသားများ ဖမ်းဆီးခံနေရမှုများလည်းရှိနေသည်။

SHARE

LEAVE A REPLY

Please enter your comment!
Please enter your name here