တရုတ်ပြည်သို့ အလှမယ်ပြိုင်ပွဲဝင်သည့် နမ့်ခမ်းအလှမယ် ရန်ကုန်ပြန်ရောက်

0

မြန်မာနိုင်ငံကိုယ်စားပြုပြီး တရုတ်နိုင်ငံတွင် အလှမယ်သွားရောက်ယှဉ်ပြိုင်ကာ ပြန်ရောက်လာသည့် Miss All Nation ၂၀၁၇-၂၀၁၈ နန်းမွေခမ်းအား ရန်ကုန်အခြေစိုက် သျှမ်းလူမှုရေးအသိုင်း အဖွဲ့များ စုပေါင်း ကာ လေဆိပ်တွင်သွားရောက်ကြိုဆိုကြကြောင်းသိရသည်။

ဂျန္နဝါရီလ ၂၅ ရက်နေ့က ရန်ကုန်မြို့အပြည်ပြည်ဆိုင်ရာလေဆိပ်တွင် ရန်ကုန်သျှမ်းစာပေ နှင့်ယဉ်ကျေးမှုအသင်း၊ သျှမ်းလူငယ်အဖွဲ့ SYO တို့အပြင် သျှမ်းလူမှုအသိုင်းအဝိုင်းက လူငယ်များက တရုတ်နိုင်ငံမှ အလှမယ်ပြိုင်ပွဲ ဆု ၂ ဆုဆွတ်ခူးရရှိလာခဲ့သော နန်းမွေခမ်းအား သွားရောက်ကြို ဆိုခဲ့ကြခြင်းဖြစ်သည်။

သျှမ်းပြည်မြောက်ပိုင်း နမ့်ခမ်းသူဖြစ်သည့် အလှမယ် နန်းမွေခမ်းက – “ ၂၅ ရက်နေ့က မွန်းလွဲ ၂ နာရီလောက်က ကျမ ရန်ကုန်ကိုပြန်လည်ရောက်ရှိခဲ့ပါတယ်။ တရုတ်နိုင်ငံမှာ အလှမယ်သွားပြိုင် ခွင့်ရတာ ကျမအတွက် အတွေ့အကြုံတွေအများကြီးရရှိစေခဲ့ပါတယ်။ နိုင်ငံတကာက မိတ်ဆွေတွေရ ခဲ့တယ်။ သူတို့ဘယ်လိုနေထိုင်စားသောက်ကြသလဲဆိုတာကို သိခွင့်ရခဲ့တယ်။ ကျမကို ယုံကြည်စိတ် ချစွာနဲ့ တရုတ်နိုင်ငံမှာပြိုင်ပွဲဝင်ဖို့ စေလွှတ်တဲ့ Miss Golden Land အဖွဲ့ကိုလည်းကျေးဇူးတင်တယ်။ ကျမကိုယ်စွမ်းဉာဏ်စွမ်းရှိသလောက် ကြိုးစားပြီးယှဉ်ပြိုင်ခဲ့ပါတယ်။ ပထမဆုမရခဲ့တာတောင်မှ ဆု ၂ ခုကိုတော့ဆွတ်ခူးပေးခဲ့ပါတယ်။” – ဟု သျှမ်းသံတော်ဆင့်အားပြောပြသည်။

တရုတ်နိုင်ငံ မယ်ပြိုင်ပွဲမှ နန်းမွေခမ်း ဆွတ်ခူးရရှိခဲ့သော ဆု ၂ ခုမှာ Miss Eco Tourism award နှင့် Miaoyu ဆုတို့ဖြစ်ကြောင်းသိရသည်။

“ Miss Eco Tourism award ဆုကတော့ ကျမအနေနဲ့ (သျှမ်း၊ တရုတ်၊ ဗမာ၊ အင်္ဂလိပ်နဲ့ ထိုင်း) စတဲ့ ဘာသာစကား ၅ မျိုးကိုပြောဆိုနိုင်လို့ ပေးတာဖြစ်တယ်လို့ထင်ပါတယ်။ Miaoyu ဆုကတော့ ကျမဝတ် ဆင်ပြီးပြိုင်ပွဲဝင်တဲ့ သျှမ်း၀တ်စုံနဲ့အပြင်အဆင်ကိုကြည့်ပြီးပေးတာလို့သိရပါတယ်။ မောင်ငယ် ညီမငယ်လေးတွေ ပြိုင်ပွဲဝင်ဖို့ဆန္ဒရှိတယ်ဆိုရင် ကျမကို ဆက်သွယ်မေးမြန်းလို့ရပါတယ်။ ကျမ လမ်းညွှန်ပေးနိုင်ပါတယ် ” – ဟုနန်းမွေခမ်းကပြောသည်။

တရုတ်နိုင်ငံ ယန်ကျင်းမြို့တွင်ကျင်းပသော အလှမယ်ပြိုင်ပွဲသို့ ဒီဇင်ဘာလ ၂၅ ရက်နေ့မှ ဂျန္နဝါရီ ၂၅ ရက်နေ့အထိ ကျင်းပသည့် နိုင်ငံပေါင်း ၃၀ ကျော် အလှမယ်ပြိုင်ပွဲတွင် မြန်မာနိုင်ငံကိုယ်စားပြု နမ့်ခမ်းသူ နန်းမွေခမ်း က သွားရောက်ယှဉ်ပြိုင်ခဲ့ခြင်းဖြစ်ပါသည်။

နန်းမွေခမ်းသည် သျှမ်းပြည်မြောက်ပိုင်းကိုယ်စားပြု Miss Golden Land အလှမယ်ပြိုင်ပွဲတွင် ပြီးခဲ့သည့်နှစ် ဂျူလိုင်လက ယှဉ်ပြိုင်အနိုင်ရခဲ့ပြီး အောက်တိုဘာလတွင်မူ Miss All Nation Myanmar 2017 ဆုကိုဆွတ်ခူးရရှိခဲ့ခြင်းဖြစ်ပါသည်။

SHARE

LEAVE A REPLY

Please enter your comment!
Please enter your name here