တစီးဒေါ်လာသန်း ၅၀ တန်သည့် ရုရှားလုပ်ခေတ်မှီ တိုက်လေယာဉ် ၆ စီး မြန်မာ့တပ်မတော်ဝယ်ယူ

0

မြန်မာ့တပ်မတော်ကို Su-30 အမည်ရှိ ခေတ်မှီတိုက်ခိုက်ရေးလေယာဉ်အမျိုးအစား ၆ စီးရောင်းချပေးတယ်လို့ မြန်မာနိုင်ငံကိုသွား ရောက်လည်ပတ်မှုအပြီး ရုရှားအစိုးရက ကြေငြာခဲ့ပါတယ်။

ဂျန္နဝါရီလ ၂၀ ရက်နေ့က ရုရှားနိုင်ငံ ကာကွယ်ရေးဝန်ကြီး ဗိုလ်ချုပ်ကြီး Sergei Shigu က မြန်မာနိုင်ငံကို ရောက်ရှိလည်ပတ်ခဲ့ပြီး မြန်မာစစ်တပ်ကအကြီးအကဲနဲ့တွေ့ဆုံရာမှာ ကာကွယ်ရေး စစ်ရေးအပြင် စစ်တပ် ပိုင်းဆိုင်ရာ နည်းပညာ Military Technology တွေမှာပူးပေါင်းဆောင်ရွက်သွားမယ်လို့ ဆွေးနွေးသဘော တူစာချုပ်လက်မှတ်ရေးထိုးခဲ့ကြောင်း ဂျန္နဝါရီလ ၂၂ ရက်နေ့ကထုတ်ပြန်တဲ့ ရုရှားနိုင်ငံပိုင်သတင်းမှာ ရေးသားထားပါတယ်။

ရုရှားက ရောင်းချပေးတဲ့ တိုက်ခိုက်ရေးလေယာဉ်အမျိုးအစား Su-30 ဟာ မြန်မာ့တပ်မတော်မှာ ဝေဟင်ထိုး စစ်ကနေအဓိက အသုံးပြုသွားမှာဖြစ်ကြောင်းဆိုပါတယ်။ ကမ္ဘာ့အဆင့်မှီ တိုက်လေယာဉ်အမျိုးအစားဖြစ်ပြီး ဒီလေယာဉ်ကို ရုရှားနိုင်ငံတပ်မတော်က ဝေဟင်ကနေ ဗုံးကျဲတိုက်ခိုက်ခြင်း၊ တဘက်တိုက်လေယာဉ်တွေကို လိုက်လံတိုက်ခိုက်ခြင်း၊ မြေပြင်စစ်ကြောင်းကို စစ်ကူတိုက်ပေးခြင်း စတဲ့ တိုက်ပွဲတွေ ၀င်နိုင်တယ်လို့ ရုရှားသတင်းမှာဖော်ပြထားပါတယ်။

အချုပ်အခြာအာဏာကာကွယ်ဖို့ ၊ အကြမ်းဖက်မှုတွေခြေမုန်းဖို့အတွက် နဲ့ အရှေ့တောင်အာရှာမှာ အင်အားကောင်းတဲ့ လေတပ်မတော်ဖြစ်ဖို့ အဓိက ဖြစ်တယ်လို့လဲ ပါရှိပါတယ်။

အရှေ့တောင်အာရှနိုင်ငံတွေထဲမှာ ရုရှားနိုင်ငံရဲ့ ဒီတိုက်လေယာဉ်တွေကိုအသုံးပြုတဲ့နိုင်ငံဆိုလို့ ဗီယက်နမ်၊ အင်တိုနီးရှား၊ မလေးရှားနဲ့မြန်မာနိုင်ငံ တို့ ဖြစ်ပါတယ်။

အစိုးရတပ်မတော်ကတော့ ၂၀၁၅ ခုနှစ်က ကိုးကန့်တပ်ဖွဲဲ့MNDAA ကို တိုက်ခိုက်ရာမှာ MiG-29 အမျိုးအစားကို အဓိကအသုံးပြုပါတယ်။

မြန်မာ့တပ်မတော်ဘက်ကတော့ ရုရှားရဲ့တိုက်လေယာဉ်အပြင် ရုရှားရဲ့ Kilo အမည်ရ ရေငုပ်သင်္ဘောကိုပါ ၀ယ်ယူလိုတဲ့ဆန္ဒရှ်ိကြောင်း၊ ကနဦးအနေနဲ့ ရေငုပ်သင်္ဘော ၃ စီးကို၀ယ်ယူလိုပြီး ဘင်္ဂလားပင်လယ်အော်မှာ ထားရှိသွားမယ်လို့လည်း ဖော်ပြထားပါတယ်။

ပြီးခဲ့တဲ့အပတ်ကဘဲ မြန်မာ့တပ်မတော်ဟာ ကာကွယ်ရေးအတွက်အသုံးပြုဖို့ ၆ လ စာ ဘတ်ဂျက် အတွက် လွှတ်တော်အတွင်း ငွေကျပ် ၁၃၀၀ ဘီလီယံ ကျော် တောင်းဆိုထားတယ်လို့လည်း မြန်မာ့မီဒီယာတွေမှာ ဖော်ပြထားပါတယ်။

SHARE

LEAVE A REPLY

Please enter your comment!
Please enter your name here