သျှမ်းပြည်မြောက်ပိုင်း လားရှိုးမြို့တွင် ပြုလုပ်သော သျှမ်းတိုင်းရင်းသားများဒီမိုကရေစီအဖွဲ့ချုပ် SNLD ၏ အစည်းအဝေးတွင် ကြားဖြတ်ရွေးကောက်ပွဲ၌ ၂ နေရာ ၀င်ရောက်ယှဉ်ပြိုင်မည်ဖြစ်ကြောင်းသိရသည်။
သျှမ်းပြည်တောင်ပိုင်းလဲချားမြို့နယ်တွင် ပြီးခဲ့သည့် ဒီဇင်ဘာလက ကွယ်လွန်သွားသော ပြည်သူ့လွှတ်တော်ကိုယ်စားလှယ် စိုင်းမွန်း၏နေရာနှင့် ယခု ဂျန္နဝါရီလဆန်းက ကွယ်လွန်သွားသော မန္တလေးတိုင်း သျှမ်းတိုင်းရင်းသားရေးရာဝန်ကြီး ဦးကျော်ဇော၏ နေရာတွင်ဖြစ်ကြောင်းသိရသည်။
သျှမ်းပြည်တောင်ပိုင်း လွယ်လင်မြိ့နယ် SNLD ပါတီ ပြည်နယ်လွှတ်တော်အမတ် နန်းမြထွေးက – ဒီအစည်းအဝေးကနေ SNLD အနေနဲ့ ကြားဖြတ်ရွေးကောက်ပွဲဝင်မယ်လို့ဘဲဆွေးနွေးဆုံးဖြတ်ထားပါတယ်။ ၀င်ရောက်ယှဉ်ပြိုင်မယ့်သူရဲ့နာမည်ကိုတော့ သက်ဆိုင်ရာဒေသက ရွေးချယ်ပြီးတင်ပြလာမှသိရမှာပါ။ – ဟု သျှမ်းသံတော်ဆင့်အားပြောပြသည်။
SNLD ၏ ဗဟိုအစည်းအဝေးကို လားရှိုးမြို့ Sky View ဟိုတယ်တွင် ဂျန္နဝါရီလ ၂၀ နှင့် ၂၁ ရက်နေ့ ၂ ရက် တာကျင်းပခဲ့ရာ ကြားဖြတ်ရွေးကောက်ပွဲဝင်ရေးအပြင် ပြီးခဲ့သည့်နှစ်အတွင်းလုပ်ဆောင်ခဲ့သည့် လုပ်ငန်းဆောင် တာ များကိုပြန်လည်ဆွေးနွေးခြင်း၊ လာမည့်နှစ်အတွက်လုပ်ငန်းစဉ်များချမှတ်ခြင်းများကိုပါ ဆွေးနွေးခဲ့ကြ ကြောင်းသိရသည်။
လစ်ဟင်းနေသော လွှတ်တော်ကိုယ်စားလှယ်များနေရာအတွက် ၂၀၁၈ အတွင်း ကြားဖြတ်ရွေးကောက်ပွဲကျင်းပပေးမည်ဟု ပြည်ထောင်စုရွေးကောက်ပွဲကော်မရှင်ကပြောဆိုခဲ့သော်လည်း ကျင်းပမည့်ရက်စွဲအတိအကျကိုမူ မကြေငြာသေးပေ။ ကြားဖြတ်ရွေးကောက်ပွဲအတွက် ကျပ်ငွေသန်းပေါင်း ၁၆၀၀ ကျော်အသုံးပြုကာ ဂျွန်လမတိုင်ခင်ပြုလုပ်ကျင်းပရန်ရှိသည်ဟုလည်း သတင်းများထွက်နေပါသည်။
လက်ရှိတွင် ပြည်နယ်နှင့်တိုင်းများ၌ လစ်လပ်နေသော လွှတ်တော်ကိုယ်စားလှယ် ၉ နေရာရှိကြောင်း ဆိုပါသည်။ ပြီးခဲ့သည့်နှစ် ဧပြီလက ကျင်းပသော ကြားဖြတ်ရွေးကောက်ပွဲတွင်မူ သျှမ်းပြည်နယ်အတွင်း လစ်လပ်နေရာ ၈ နေရာရှိပြီး SNLD ပါတီက ၀င်ရောက်ယှဉ်ပြိုင်ရာ ၆ နေရာအနိုင်ရရှိခဲ့သည်။ ၂၀၁၅ ပါတီစုံရွေးကောက်ပွဲတွင်မူ SNLD ပါတီမှ လွှတ်တော်ကိုယ်စားလှယ် နေရာ ၄၀ အနိုင်ရရှိခဲ့ပါသည်။
