တောင်ကြီးမြို့နယ်အတွင်းရှိ အများပြည်သူနှင့် သက်ဆိုင်သည့် နေရာများ အပြင် အထူးပြုနေရာ (၁၀) ခုတွင် အရက်သေစာသောက်စားခြင်း ၊ မူးရစ်ရမ်းကားခြင်း ၊ အုပ်စုဖွဲ့ရန်ဖြစ်ခြင်း ၊ အများပြည် သူညိုငြင်စေရန်ပြုမူပြောဆိုခြင်း များပြုလုပ်ပါက ပြစ်မှုဆိုင်ရာပုဒ်မ (၁၈၈) အရ အရေးယူသွားမည်ဟု တောင်ကြီးမြို့နယ် အုပ်ချုပ်ရေးမှူး ဦးမင်းစိုး ကပြောသည် ။
” အဓိက ကတော့အများပြည်သူ အနှောက်အယှက်မဖြစ်အောင်ပေါ့ ပိုပြီးတော့ စည်းကမ်းတကျ ဖြစ်သွားအောင်လို့ သွားရလာရတာပိုပြီးလွယ်ကူအောင်လို့ ၊ မြို့ထဲမှာဆိုရင် ဆိုင်ကယ်တန်းလို နေရာမျိုးမှာ အရက်ထိုင်သောက်နေကြတာ ညရေးညတာ အလုပ်ကိစ္စနဲ့ သွားတဲ့လူတွေအတွက် အခက်အခဲရှိတာပေါ့ ၊ ဒါကြောင့် အစိုးရဆီက အတည်ပြုချက်အရင်ထုတ်ပြီး ပန်းခြံတွေ ကျောင်းတွေ ဆေးရုံတွေရယ် အများပြည်သူနှင့် သက်ဆိုင်တဲ့ နေရာများအပြင် အထူးပြုနေရာတွေမှာ အရက် သောက်မယ်ဆိုရင် ပြစ်မှုဆိုင်ရာပုဒ်မ(၁၈၈)နဲ့အရေးယူလို့ရတယ်ဆိုတာပြည်သူ လူထုပိုပြီးသိသွား အောင်လို့တားမြစ်ချက် ထုတ်လိုက်တဲ့သဘောပဲ ” ဟု ၄င်းက ပြောသည် ။
တောင်ကြီးမြို့ပေါ်ရှိ အများပြည်သူနှင့် သက်ဆိုင်သည့် နေရာများ အပြင် အထူးပြုနေရာ (၁၀) နေရာမှာ ကျောင်းကြီးစုရပ်ကွက် အဝေရာမီးပုံးပျံကွင်း ၊ ကန်ရှေ့ရပ်ကွက် ကုန်သည်လမ်းနှင့် မြကန်သာ လမ်းကြားရှိ ဗိုလ်ချုပ်အောင်ဆန်းလမ်း ၏အရှေ့ဘက် ဆိုင်ကယ်ရပ်နား နေရာ ၊ ရေအေးကွင်းရပ် K&K စတိုးရှေ့မြေကွက် လပ်နှင့် မြစိမ်းတောင်ဘုရား အတက် လမ်း ၊ လမ်းမတော်ရပ်ကွက် ၊ ဘုရင့်နောင်လမ်းသွယ် (အောက်မေ့ဖွယ်ဓမ္မာရုံ လမ်းသွယ် ) မင်္ဂလာဦးရပ်ကွက် ၊ဗိုလ်ချုပ်အောင်ဆန်းလမ်းရှိ မြင်းရုပ် ပရဝဏ် အနီး ၊သစ်တောရပ်ကွက် ၊ အိမ်တော်ထင်းရှူးကွင်းနှင့် အိမ်တော်ဝိုင်းလမ်းဆုံ ၊စူဌာမုနိ လောကချမ်းသာ စေတီတော်နှင့် တောင်ကြီး ဂေါက်ကလပ်ဘက်လမ်း ၊ စဝ်စံထွန်း ရပ်ကွက်ရှုခင်းသာ ပန်းခြံနှင့်ကြိုးတံတားအနီး ၊ စျေးပိုင်းရပ်ကွက် ၊ မြို့မစျေး အနီး ၀န်းကျင် ၊ ကံကြီးရပ်ကွက် ဖူဆယ်ဘောလုံးကွင်းအနီးဝန်းကျင် စသည့် နေရာများဖြစ်သည် ။
အဆိုပါ တားမြစ်ချက်ကို ဂျန္နဝါရီလ ၁၇ ရက်နေ့မှစ၍တောင်ကြီး မြို့နယ်အထွေထွေ အုပ်ချုပ်ရေး ဦးစီးဌာနမှ ဒေသန္တရ အမိန့်အဖြစ်ထုတ်ပြန်လိုက်ခြင်းဖြစ်သည်။
