ညီညွတ်သောတိုင်းရင်းသားလူမျိုးများဖက်ဒရယ်ကောင်စီ UNFC နှင့် အပစ်ရပ် အဖွဲ့ NCA – EAOs တို့၏ ငြိမ်းချမ်းရေးလုပ် ငန်းစဉ် ဦးဆောင်အဖွဲ့ (PPST) တို့ ချင်းမိုင်မြို့တွင် ပထမ အကြိမ်တွေ့ဆုံ ပြီးသည့်နောက် ဒုတိယ အကြိမ်အတွက် RCSS/SSA ဌာနချုပ် တွင်တွေ့ဆုံကြရန် အဆိုပြု ထားကြ သည်ဟု ဆိုသည်။
“လာမည့်လ ၇ ရက်ဆို သျှမ်းပြည်အမျိုးသားနေ့ဆိုတော့ အဲဒီအခမ်းအနားနဲ့ တိုက်ဆိုင်တယ်။ အစည်း အဝေးလာတက်ရင်း အခမ်းအနားလဲ တက်နိုက်မယ်ပေါ့။ တချို့ခေါင်းဆောင်တွေလဲ လာချင်တယ် ဆိုတော့ အဆိုတင်သွင်းကြတာဖြစ်တယ်” – ဟု RCSS/SSA အရာရှိတဦးက ပြောသည်။
ဂျန္နဝါရီလ ၁၁ နှင့် ၁၂ ရက်နေ့တို့တွင်ပြုလုပ်သော PPST ခေါင်းဆောင်များအရေးပေါ်အစည်းအဝေးမှ ဆုံးဖြတ်ချက်များအပေါ်မူတည်၍ ဂျန္နဝါရီလ ၁၃ ရက်နေ့တွင် UNFC နှင့် PPST ခေါင်းဆောင်များ တွေ့ဆုံခဲ့ခြင်းဖြစ်သည်။ နောက်တကြိမ်ထပ်မံတွေ့ရန်အတွက် သျှမ်းပြည်ပြန်လည်ထူထောင်ရေး ကောင်စီ သျှမ်းပြည်တပ်မတော် ဌာနချုပ် လွယ်တိုင်းလျဲန်းတွင် ဆန္ဒရှိကြသည်ဟု အကြံပြုကြခြင်းဖြစ်ကြောင်းသိရသည်။
အဆိုပါ အဖွဲ့ ၂ ဖွဲ့ကြားပြုလုပ်သော ပထမဆုံးအကြိမ်တွေ့ဆုံပွဲတွင် – ဖက်ဒရယ်နှင့်ဒီမိုကရေစီပြည် ထောင်စု စုပေါင်းတည်ဆောက်ရာတွင် စုပေါင်းအားဖြင့် ပြိုင်တူတွန်းနိုင်ရန် NCA လက်မှတ်မထိုးရ သေးသော တိုင်းရင်းသားလက်နက်ကိုင်တပ်ဖွဲ့များအနေဖြင့် NCA လက်မှတ်ရေးထိုးဖို့လိုကြောင်း လည်း အပစ်ရပ်ထားသည့်အဖွဲ့များက တိုက်တွန်းကြသည်ဟု ဆိုသည်။
“ ၁၃ ရက်နေ့က ဆွေးနွေးပွဲ မှာ UNFC ကပြောတယ်။ လက်ရှိအခြေအနေက ရှုပ်ထွေးနေတယ်။ အစိုးရနဲ့ညှိနှိုင်းလည်းမရဘူး။ ကရင်နီဘက်ကလည်းအသတ်ခံရတယ်။ RCSS ကလည်း လူထုတွေ့ဆုံပွဲမှာ ပိတ်ပင်ခြင်းခံရတယ်။ သျှမ်းပြည်မြောက်ပိုင်းမှာလည်းတိုက်ပွဲတွေဖြစ်နေတယ်။ ဒါကြောင့် မိမိတို့ စည်းလုံးညီညွတ်ရေးအတွက် ရင်းနှီးမှုတည်ဆောက်ရမယ်။ မကြာခန တွေ့ဆုံမှုပြုရမယ်- ဒုတိယ အကြိမ်ထပ်တွေ့ရင် လွယ်တိုင်းလျဲန်းမှာတွေ့လိုကြတယ်ပြောတယ်” – ဟု ပြည်ထောင်စုအင်စတီကျုမှဒါရိုက်တာ ဦးခွန်စိုင်းက ပြောသည်။
UNFC နှင့် PPST တို့သည် ယခုပထမဆုံးအကြိမ် တွေ့ဆုံဆွေးနွေးမှု ဟုသာဆိုသော်လည်း UNFC ၏ နိုင်ငံရေးဆွေးနွေးရေးဆိုင်ရာ DPN အဖွဲ့ နှင့် PPST ၏ ကိုယ်စားလှယ် PPWT တို့မှာမူ ၈ ကြိမ်တွေ့ဆုံ ဆွေး နွေးခဲ့ကြပြီးဖြစ်သည်။
တနိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ် NCA လက်မှတ်ရေးထိုးပြီးသော တိုင်းရင်းသား လက် နက် ကိုင်တပ်ဖွဲ့ ၈ ဖွဲ့ NCA – EAO’s တွင် သျှမ်းပြည်ပြန်လည်ထူထောင်ရေးကောင်စီ သျှမ်းပြည် တပ်မတော် RCSS/SSA ၊ ပအိုဝ်းအမျိုးသားလွတ်မြောက်ရေးအဖွဲ့ PNLO ချင်းအမျိုး သားတပ်ဦး CNF ၊ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး ABSDF ၊ ကရင်အမျိုးသား အစည်းအရုံး KNU ၊ ဒီမိုကရေစီအကျိုးပြု ကရင့်တပ်မတော် DKBA ၊ ကရင်ငြိမ်း ချမ်းရေးကောင်စီ KNLA-PC နှင့် ရခိုင်အမျိုးသားလွတ်မြောက်ရေးပါတီ ALP တို့ပါဝင်ပါသည်။
ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ UNFC တွင်မူ ကရင်နီအမျိုးသား တိုးတက်ရေးပါတီ KNPP ၊ မွန်ပြည်သစ်ပါတီ NMSP ၊ လားဟူဒီမိုကရက်တစ်အစည်းအရုံး LDU နှင့် ရခိုင်အမျိုးသားကောင်စီ ANC တို့ဖြစ်ကြသည်။
