ဌာနေပြည်သူ့စစ်များအခွန်ကောက်ခံမှုစုပေါင်းဖြေရှင်းနိုင်ရန် လားရှိုးခရိုင်လွှတ်တော်အမတ်နှင့် လူထုတွေ့ဆုံဆွေးနွေး

0

သျှမ်းပြည်မြောက်ပိုင်း လားရှိုးခရိုင် ဌာနေပြည်သူ့စစ်လှုပ်ရှားရာဒေသအတွင်း ရင်ဆိုင်နေရသည့် အခက်အခဲများကို အမျိုးသားလွှတ်တော်ကိုယ်စားလှယ်စိုင်းဝမ်းလျန်းခမ်းနှင့် တွေ့ဆုံစဉ် ဒေသခံလူထုက တင်ပြခဲ့ကြောင်းသိရသည်။

ဂျန္နဝါရီလ ၁၃ ရက်နေ့ မွန်းတည့် ချိန်မှ ညနေ ၃ နာရီအထိ အမျိုးသားလွှတ်တော် ကိုယ်စားလှယ် စိုင်းဝမ်းလျန်းခမ်းနှင့်အဖွဲ့က လားရှိုးမြို့နယ် နားနန်းအုပ်စု ၊ မိန်းပိုင်အုပ်စုနှင့် တွန်းနေအုပ်စုမှဒေသခံများအား တွန်းနေအုပ်စုရှိ ဘုန်းကြီးကျောင်းတွင် ဒေသခံလူထုနှင့်တွေ့ဆုံစဉ် လူထုမှ အခက်အခဲကြားရုန်းကန်နေရသည့်ဘ၀ကိုရှင်းပြခဲ့ခြင်းဖြစ်ကြောင်း ဆိုပါသည်။

“ လူထုကတင်ပြလာတာတွေကတော့ မန်ပန်ဌာနေပြည်သူ့စစ်တွေက ဒေသခံလူထုပိုင်ဆိုင်မှုကို နှစ်စဉ်ကြေးအဖြစ် ထော်လာဂျီတွေဆိုရင် တနှစ်စာ ကျပ် ၂ သောင်းကနေ ၅ သောင်းအထိ၊ ဆန်စက်၊ ဆီစက်တွေ ၊ ရေစက်မီးစက်တွေဆိုရင် ၅ သောင်းကနေ တသိန်းအထိ အဲလိုအစားစား ခွဲပြီးတော့ ကောက်ခံတယ်။ ဒါ့အပြင် ကောက်ပဲသီးနှံတွေထွက်လာချိန်မှာလည်း မြို့ဈေးတွေတခြားဒေသတွေ ကိုတင်သွားရောင်းရင်လည်း ဂိတ်ဖြတ်သန်းတဲ့အခါမှာ ထော်လာဂျီ အကြီးအသေး ကားအကြီး အသေးအပေါ်မူတည်ပြီးတော့ ကျပ်ထောင်ဂဏန်းကနေ သောင်းဂဏန်းအထိပေး ဆောင်ရတယ်လို့တင်ပြလာတယ်။ ဒါ့အပြင် လစဉ်လတိုင်း ရွာသား ၁၀ ယောက်လောက်က တလ ၂ ကြိမ် သူတို့ရဲ့လွယ်ပန်လွန်းတပ်စခန်းဆီကို ဆန် တယောက် ၄ ပြည် ထမ်းပို့ပေးရတယ်။ အဲတာတွေဟာလည်း လူထုရဲ့စားဝတ်နေရေးကိုထိခိုက်စေတယ် -အဲတာတွေကို ကူညီဖြေရှင်းပေးဖို့ လူထုတောင်းဆိုလာတယ်” ဟု စိုင်းဝမ်းလျန်းခမ်းကပြောဆိုသည်။

ထိုသို့သောလူထုအပေါ်ခြိမ်းခြောက် လုပ်အားခိုင်းစေခြင်းမျိုးမှာ ကနေ့ခေတ်တွင်မရှိသင့်တော့ကြောင်း ၊ လက်အောက်ငယ်သားများ ထိုသို့ကျူးလွန်နေမှုအပေါ် ပြည်သူ့စစ်တပ်ဖွဲ့အထက်အကြီးအကဲများက စီစစ်ပေးသင့်ကြောင်း ၎င်းကပြောဆိုသည်။

“အခုလူထုကတင်ပြတောင်းဆိုလာတဲ့အခက်အခဲတွေ ဖြေရှင်းနိုင်အောင် ကျနော်တို့ကြိုးစားပါမယ်။ နောက်ပြီး လမ်းပန်းဆက်သွယ်ရေး အခက်အခဲဖြစ်နေတာတွေ ၊ စာသင်ကျောင်းတွေ ။ အမြန်ဆုံးလာပြီးဆောက်လုပ်ပေးဖို့လည်း လွှတ်တော်မှာ ပြန်သွားတင်ပြပေးမယ်။” – ဟု စိုင်းဝမ်းလျန်းခမ်းကပြောဆိုသည်။

အမျိုးသားလွှတ်တော်အစည်းအဝေးကို ဂျန္နဝါရီလ ၁၅ ရက်နေ့တွင်ပြန်လည်စတင်ပါသည်။

SHARE

LEAVE A REPLY

Please enter your comment!
Please enter your name here