ရလခ တိုင်းရုံးအနီးဓါးပြတိုက်မှုဆက်တိုက်ဖြစ်ပွါး ခရီးသွားလူထု လုံခြုံရေးစိုးရိမ်

0

သျှမ်းပြည်တောင်ပိုင်း လွယ်လင်ခရိုင်အတွင်းရှိ ရလခရုံးစိုက်ရာ ခိုလမ်မြို့နယ်ခွဲ အနီး မိုင်းနောင်မြို့ အသွား လမ်းတွင် ဓါးပြတိုက်မှု ဆက်တိုက်ဖြစ်ပွါးလာသည့်အပေါ် ခရီးသွားလူထု လုံခြုံမှုအတွက် အထူးစိုးရိမ်နေကြကြောင်း ကျေးသီးဒေသခံများပြောပြချက်အရ သိရသည်။

အဆိုပါဓါးပြအဖွဲ့မှာ လူ ၃ ဦးမှ ၅ ဦးအထိ ရှိပြီး ခရီးသွားများအား မကြာခဏဓါးပြ ထွက် တိုက်လေ့ရှိကြောင်း ခိုလမ်တိုင်းရုံးနှင့် သိပ်မဝေးသော ၀မ့်စိမ်း-ဆိုင်းမွန် လမ်းပိုင်းတွင်ဖြစ်ကြောင်း ခရီးသွားကားသမား များကပြောသည်။

“ပြီးခဲ့တဲ့ တနင်္လာနေ့က ဓါးပြတိုက်ပြီး ပစ်ခတ်တာကြောင့် မိုးနဲက ၉ တန်းကျောင်းသားလေး သေသွားတဲ့ ကိစ္စ မှာလည်း ခုထိ ဓါးပြတွေကိုမဖမ်းမိသေးဘူး။ သေသွားတဲ့ကျောင်းသားလေးရဲ့မိဘတွေကတော့ ရဲစခန်းမှာအမှု သွားဖွင့်ထားတယ်။ ဓါးပြတိုက်မှုက ဆက်တိုက်ဆိုသလိုပြန်ဖြစ်လာတာတွေ့ရတယ်။ မကြာသေးခင်ကဘဲ ကျေးသီးမြို့က ကားတစီးလည်း အဲဒီလမ်းမှာဘဲ ဓါးပြတွေရဲ့ ပစ်ခတ်မှုခံရတယ်။ တော်သေးတယ် လူကို မထိလို့။ ကားကိုဘဲထိသွားတယ်။ ခရီးသွားလူထုရဲ့လုံခြုံရေးအတွက် အထူးစိုးရိမ်ရ တဲ့အခြေအနေဖြစ်ပါတယ် ”- ဟု ကျေးသီးမြို့နယ် သျှမ်းတိုင်းရင်းသားများဒီမိုကရေစီအဖွဲ့ချုပ် ပြည်နယ်လွှတ်တော်အမတ် စိုင်းစံမိန်းက လည်း သျှမ်းသံတော်ဆင့်အားပြောပြသည်။

ဂျန္နဝါရီလ ၈ ရက်နေ့က ကျေးသီးမြို့အရှေ့တောင်ဘက် ၀မ့်စင်းနှင့် ဆိုင်းမွန်ရွာကြား ခိုလမ်ဘက်မောင်းနှင် လာသည့် ဦးသီဟနှင့်ဒေါ်နှင်းနှင်းခိုင်တို့မိသားစု၏ ကား ဓါးပြတိုက်ခံရမှုတွင် ကားမောင်းလာသည့် သားဖြစ်သူ မောင်ရဲထက်အောင်အား ဓါးပြအဖွဲ့မှ ပစ်ခတ်သဖြင့် ပွဲချင်းပြီးသေဆုံးသွားခဲ့သည်။

“ဓါးပြတိုက်မှု မကြားတာ ၃-၄ နှစ်လောက်ရှိပြီ။ ပြီးခဲ့တဲ့ ၁ နှစ် ၂ နှစ်ကမှ ဒီလမ်းပိုင်းမှာ ဓါးပြ ပြန်ပေါလာတာ။ အဲ့ဘက် ခရီးထွက်ရမယ်ဆိုရင် စိုးရိမ်ကြောင့်ကြ နေရတယ် ” – ဟုလည်း ကုန်သည် နန်းအေး ကပြောသည်။

အဆိုပါဓါးပြတိုက်မှုဖြစ်ပွါးသောနေရာသည် ရလခ စစ်တိုင်းရုံးစိုက်ရာခိုလမ်နှင့် ၁၀ မိုင်ကျော်သာ ဝေးကွာ ကြောင်း၊ စစ်တိုင်းမှ စစ်အင်အားဖြန့်ကျက်နေရာယူထားသော ဒေသဖြစ်ကြောင်း၊ ထို့အတွက် စစ်တိုင်းမှ ဓါးပြများအား ထိရောက်စွာ ရှာဖွေအရေးယူပေးပါရန်တိုက်တွန်းကြောင်း ပြည်နယ်လွှတ်တော်အမတ် စိုင်းစံမိန်း ကပြောဆိုသည်။

SHARE

LEAVE A REPLY

Please enter your comment!
Please enter your name here