ပြည်ထောင်စုအဆင့်အပစ်ရပ်ချိန်မှ ကနေ့အထိ အစိုးရတပ်မတော် မှ တိုက်ပွဲပေါင်း ၅၀၀ ကျော် ဆင်နွဲ ဟု သျှမ်းပြည်တပ်မတော် SSPP/SSA ထုတ်ပြန်

0

တောင်ကြီးမြို့တွင် နေပြည်တော်အစိုးရ နှင့် ပြည်ထောင်စုအဆင့် ငြိမ်းချမ်းရေး တည်ဆောက် ချိန်မှ၍ ယနေ့အထိ ၅ နှစ်တာအတွင်း အစိုးရတပ်မတော်မှ သျှမ်းပြည်တပ်မတော် SSPP/SSA အား အကြိမ် ပေါင်း ၅၀၀ ကျော် ထိုးစစ်ဆင်တိုက်ခိုက်သည် ဗဟိုကော်မတီအစည်းအဝေး အပြီး ထုတ်ပြန်ချက်တွင် ပါရှိသည်။

သျှမ်းပြည်တိုးတက်ရေးပါတီ SSPP/SSA ၏ ဗဟိုကော်မတီ မျက်နှာစုံညီအစည်းဝေး၊ ၂၀၁၇ နှစ်ချုပ် အစည်းအဝေးအား ၂၀၁၈ ဂျန္နဝါရီ ၆ ရက်မှ ၁၃ ရက်နေ့အထိ ကျင်းပခဲ့သည်။ ထိုအစည်းအဝေးပြီး ဂျန္နဝါရီ ၁၄ ရက်နေ့ အတွက် အချက် ၆ ချက်ပါ ကြေငြာချက်တစောင်ထုတ်ပြန်ရာတွင် ငြိမ်းချမ်း ရေးတည်ဆောက်စဉ် ၅ နှစ်သာ ကာလ အတွင်း တိုက်ပွဲပေါင်း အကြိမ် ၅၀၀ ထိုးစစ်ဆင်တိုက် ခိုက်ခံ ရကြောင်း၊ သျှမ်းပြည်တိုးတက်ရေးပါတီ SSPP/SSA အဖွဲ့ဝင် ၄၀ ကျော်အား လည်း ဖမ်းဆီးထိန်းသိမ်း ခံထားရကြောင်း ပါရှိသည်။

“ကျနော်တို့က ငြိမ်းချမ်းတဲ့နည်းနဲ့ နိုင်ငံရေးပြဿနာကို ဖြေရှင်းချင်လို့ အပစ်ရပ်တာ။ ဆွေးနွေးညှိနှိုင်း တာ လုပ်နေတဲ့ကြားထဲ ကျနော်တို့ကို ထိုးစစ်ဆင်တာ ၂၀၁၂ ခု က နေ ခုထက်ထိ တိုက်ပွဲပေါင်း အကြိမ် ၅၀၀ ကျော်တယ်။ ကျနော်တို့လူကိုလဲ ဖမ်းဆီးတယ်။ မူစယ်၊ ကွတ်ခိုင်၊ လားရှိုး စတဲ့ အကျဉ်းထောင်တွေ၊ အချုပ်ခန်းတွေမှာ ချုပ်နှောင်ခံထားရတာ အယောက် ၄၀ ကျော်တယ်”- ဟု ဗိုလ်မှူးဘုန်းဟန်က သျှမ်းသံတော်ဆင့်သို့ပြောသည်။

ဗိုလ်ချုပ်ကြီးပန်ဖှ ဦးဆောင်သည့် သျှမ်းပြည်တိုးတက်ရေးပါတီသည် လက်ရှိတွင် ညီညွတ်သော တိုင်းရင်းသားလူမျိုးများဖက်ဒရယ်ကောင်စီမှ နှုတ်ထွက်ပြီး ဝ တပ်ဖွဲ့ UWSA ဦးဆောင်သည့် မြောက်ပိုင်းမဟာမိတ် တပ်ဖွဲ့ဝင် ၇ ဖွဲ့တွင် ပါဝင်သည်။

လက်ရှိအနေအထားတွင်လည်း မိုင်းရှူးမြို့နယ်၊ တန့်ယန်းမြို့နယ်၊ မိုင်းရယ်မြို့နယ်၊ သီပေါမြို့ နှင့် ကျေးသီးမြို့နယ်အတွင်းတွင် မကြာခဏ တိုက်ပွဲများ ဖြစ်ပွားပြီး မိုင်းရှူး ပတ္တမြားတောင် ပေါ်တွင် စစ်ရေးတင်းမာဆဲဖြစ်သည်။

အစိုးရတပ်မတော်သည် N CA လက်မှတ်ရေးထိုးရန် ငြင်းဆန်သည့် မြောက်ပိုင်းမဟာမိတ် တပ်ဖွဲ့ဝင်များအား ထိုးစစ်ဆင်သကဲ့သို့ တနိုင်ငံလုံး ပစ်ခတ်တိုက်ခိုက်မှုရပ်စဲရေးစာချုပ် NCA လက်မှတ်ရေးထိုးထားသည့် သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA နှင့်လည်း တိုက်ပွဲများမကြာခဏဖြစ်ပွားခဲ့သည်။ ဖမ်းဆီးထိန်းသိမ်းထားသည့် RCSS/SSA တပ်ဖွဲ့ဝင်များလည်း ပြန်လွှတ်ပေးခြင်းမရှိပေ။

Photo : SSPP/SSA

SHARE

LEAVE A REPLY

Please enter your comment!
Please enter your name here