သျှမ်းပြည်မြောက်ပိုင်း လားရှိုးမြို့နယ်အတွင်းရှိ မိုင်းကျက်အုပ်စု အုပ်ချုပ်ရေးမှူးရွေးချယ်ရန်အတွက် ရွာသားများ ရွေးကောက်ပွဲကျင်းပနေစဉ် ဒေသတွင်း ဌာနေပြည်သူ့စစ်တပ်ဖွဲ့မှဝင်ရောက်တားမြစ်ခြင်း ခံခဲ့ရကြောင်းသိရသည်။
ဂျန္နဝါရီလ ၆ ရက်နေ့က မိုင်းကျက်အုပ်စုတွင်ကျင်းပသော အုပ်စုအုပ်ချုပ်ရေးမှူးအသစ် ရွေးကောက်ပွဲသို့ ဒေသတွင်းလက်နက်ကိုင်ပြည်သူ့စစ်တပ်ဖွဲ့ရောက်ရှိကာ တားမြစ်ခဲ့ခြင်းဖြစ်ကြောင်း မိုင်းကျက်ဒေသခံ တဦးကသျှမ်းသံတော်ဆင့်အားပြောပြသည်။
“ကျနော်တို့ အုပ်စုဥက္ကဌ ရွေးကောက်ပွဲကိုလာတားတာ မန်ပန်ဌာနေပြည်သူ့စစ်တပ်ဖွဲ့ကဖြစ်ပါတယ်။ ဒေသအတွင်းအုပ်ချုပ်ရေးမှူး အဆင့်ရှိ စိုင်းထွန်း ဆိုသူနဲ့ သူ့ရဲ့လက်ထောက် လုံးခမ်းလုံ (နောင်အော်) တို့ ပေါ့။ ကျနော်တို့ကို ရှိနေတဲ့ အုပ်ချုပ်ရေးမှူးကိုဘဲဆက်ခန့်သွားဖို့။ အသစ်မဲပေးရွေးချယ် ဖို့မပြု လုပ်ကြဖို့ ပြောပါတယ်။ ဒီအခု အုပ်စုအုပ်ချုပ်ရေးမှူးအဟောင်းက စိုင်းထွန်းရီပါ။ သူက လူထုဘက် မရပ်တည်ပေးလို့ သူ့ကိုဆက်ပြီး အုပ်ချုပ်ရေးမှူးမခန့်ချင်တော့ဘူး။ လူထုရင်ဆိုင်နေတဲ့အခက်အခဲတွေကို လည်း ကူညီဖြေရှင်းပေးတာ မရှိဘူးလေ။” – ဟု ၄င်းကပြောသည်။
ပြည်သူ့စစ်တပ်ဖွဲ့များ ၀င်ရောက်တားမြစ်ပြီးနောက် ကျေးရွာအုပ်ချုပ်ရေးမှူးများအား – “လူထုဆန္ဒဖြင့် အုပ်စုအုပ်ချုပ်ရေးမှူးဟောင်းကိုသာပြန်လည်ရွေးကောက်တင်မြှောက်လိုက်ပြီဖြစ်ကြောင်း” အစီရင်ခံ တင်ပြရန်မှာကြားခဲ့ပြီး ဒေသခံလူထုအားလည်း – “သတင်းမပေါက်ကြားအောင်ထိန်းသိမ်းရန်နှင့် သတင်းပေါက်ကြားစေသူအား ဖမ်းဆီးမည်ဖြစ်ကြောင်း” ပြောဆိုသွားခဲ့သည်ဟု အမည်မဖော်လိုသည့် အဆိုပါမိုင်းကျက်ဒေသခံက ဆက်လက်ပြောပြသည်။
အဆိုပါ ပြည်သူ့စစ်တပ်ဖွဲ့သည် မန့်ပန်အခြေစိုက် ဗိုလ်မွန်းဦးဆောင်သည့်တပ်ဖွဲ့ဖြစ်ကြောင်း ဒေသခံများပြောပြချက်အရသိရပါသည်။
ထိုသို့ ရပ်ကျေးအုပ်ချုပ်ရေးမှူးများအား လူထုမှရွေးကောက်နေသည့်အပေါ် လက်နက်ကိုင်တပ်ဖွဲ့မှ ၀င်ရောက်တားမြစ် နှောင့်ယှက်နေခြင်းမှာ တည်ဆဲ ဥပဒေများနှင့် ဆန့်ကျင်သဖြင့် ၄င်းတို့လုပ်ရပ်မှာ မှားယွင်းနေကြောင်း ၊ လူထုအတွက် တရားမျှတမှုမရှိကြောင်း လားရှိုးခရိုင် အမျိုးသားလွှတ်တော် အမတ်ကထောက်ပြပြောဆိုသည်။
“လူထုက သူကြိုက်တဲ့လူကိုလွတ်လပ်စွာရွေးကောက်တင်မြောက်နိုင်မှ ပြောင်းလဲလာတဲ့ ဒီမိုကရေစီကျမယ်လေ။ အရင်စနစ်ဟောင်းအတိုင်း လူထုကို လက်နက် ကိုင်ခြိမ်းခြောက်ပြီး သူတို့လိုချင်တဲ့လူကိုဘဲတင်မြှောက်ခိုင်းနေတာ အမှားကြီးမှားပါတယ်။ ဘာကြောင့်လူထုကိုဒီလို ခြိမ်းခြောက်သလဲဆိုတာ ကျနော်တို့ပြန်လည် စီစစ်ရပါမယ်။ ပြီးတော့ လွှတ်တော်မှာ မေးသင့်ရင်မေးရပါလိမ့်မယ်။” – ဟု စိုင်းဝမ်းလျန်းခမ်းက ပြောသည်။
လက်ရှိအုပ်စုအုပ်ချုပ်ရေးမှူး စိုင်ထွန်းရီ (အသက် ၅၀ ၀န်းကျင်) မှာ မိုင်းကျက်ဇာတိမဟုတ်ကြောင်း ၊ အုပ်စုအုပ်ချုပ်ရေးမှူးတာဝန်ထမ်းဆောင်လာသည်မှာ ၃ နှစ်သက်တမ်းရှိပြီဖြစ်ကြောင်း၊ လက်နက်ကိုင်တပ်ဖွဲ့ဆင့်ဆိုလာမှုများအား မငြင်းဆိုဘဲဆောင်ရွက်ပေးပြီး လူထုဘက်ရပ်တည်ပေးမှုမရှိကြောင်း အသက် ၅၀ ၀န်းကျင်ရှိအဆိုပါမိုင်းကျက်ဒေသခံကပြောသည်။
ရပ်ကျေးအုပ်ချုပ်ရေးမှူးများအား ဒီမိုကရေစီနည်းဖြင့်လူထုမှရွေးကောက်တင်မြောက်ရန်အစိုးရက ယမန်နှစ်အောက်တိုဘာလ နှောင်းပိုင်းကကြေငြာခဲ့သည်။
ရပ်ကွက် သုုိ ့မဟုုတ် ကျေးရွာအုုပ်စုု အုုပ်ချုပ်ရေး ဥပဒေ ပြင်ဆင်ချက်တွင် အုပ်ချုပ်ရေးမှူး၊ ကျေးရွာတာဝန်ခံ၊ ရာအိမ်မှူး၊ ဆယ်အိမ်မှူး တို့၏ ပြည့်စုံရမည့် အရည်အချင်းများ ၁၁ ချက်ပါရှိရာ နောက်ဆုံးအချက်တွင် – လက်နက်ကိုင်အဖွဲ့အစည်းဝင်မဟုတ်ခြင်း၊ မတရားအသင်းအဖွဲ့များ၌ ပါဝင်သူ၊ ဆက်သွယ်သူမဟုတ်ခြင်း – ဟူ၍ ပါရှိပါသည်။
