သျှမ်းပြည်မြောက်ပိုင်းကျောက်မဲမြို့တွင် အစိုးရတပ်မတော်နှင့် တိုင်းရင်းသား လက်နက်ကိုင်တပ်ဖွဲ့ ကြားဖြစ်ပွား ခဲ့သောတိုက်ပွဲ များနှင့့်ပတ်သက်၍ တိုက်ပွဲ ပိုမိုပြင်းထန်လာမည် ကို စိုးရိမ်သောကြောင့် ကျောက်မဲ မြို့ပေါ်သို့ ရောက်ရှိခိုလှုံနေကြသောစစ်ရှောင်ဒုက္ခသည် တစ်ထောင်ကျော်ရှိ သည်ဟု ကျောက်မဲမြို့ ဇီဝိတ လူမှု ကူညီရေးအသင်း ဥက္ကဋ္ဌ ဦးတင်မောင်သိန်း ထံမှသိရသည် ။
ကျောက်မဲမြို့နယ်နှင့် နမ့်ဆန် မြို့နယ် ကြားရှိ အာပြောင်(အိုက်ပုံ) ၊ ကိုင်တိုင်၊ ဟင်ကြိုင်း ၊ ကျောက်ဖြူလေးရွာများ အနီး တို့တွင် ဒီဇင်ဘာလ ၂၈ ရက်နေ့က အစိုးရတပ်မတော်နှင့်တအာင်း အမျိုးသား လွတ်မြောက်ရေး တပ် TNLA တို့ဖြစ်ပွားခဲ့သောတိုက်ပွဲများကြောင့် အဆိုပါဒုက္ခသည်များက ဒီဇင်ဘာ ၃၀ ရက်နေ့မှ စ၍ ကျောက်မဲမြို့ ပေါ်သို့လာရောက်ခိုလှံု ခဲ့ခြင်းဖြစ်သည်ဟု ၄င်းကပြောသည် ။
” လတ်တလောအနေအထားကတော့ တိုက် ပွဲကြီးကြီးမားမား မဖြစ်သေးပေးမဲ့ ဖြစ်လာမယ့် အရိပ်အရောင်တွေ ရှိနေတယ်။ ရွာမှာ လေဖြတ်နေတဲ့ လူအိုတွေနဲ့ မျက်စိကွယ်နေတဲ့ လူကြီးတစ်ချို့ကလွဲ ရင် အကုန်ထွက် ပြေးလာကြတာပါ ၊ ရွာမှာ ကျန်ခဲ့တဲ့ လူတွေကိုကျနော်တို့အဖွဲ့ကနေ သက်ဆိုင်ရာတပ်တွေကိုအကြောင်းကြားပြီး သွားခေါ်မှာပါဟု ” ဦးတင်မောင်သိန်းက ဆက်လက်ပြောသည် ။
အဆိုပါစစ်ရှောင် ဒုက္ခသည် တစ််ထောင်ခန့်ကို ကျောက်မဲမြို့ ပေါ်ရှိ အောင်မြေသာယာ ၊ အောင်ဓမ္မာရုံ ၊ အောင် မင်္ဂလာ နှင့် ၀ါဆိုကျောင်း စသည့် ဘုန်းကြီး ကျောင်းများတွင် နေရာချထားလျှက်ရှိပြီး ၊ မိုင်းငေါ့မြို့နယ်တွင်လဲ စစ်ရှောင်စခန်း ၂ ခုဖွင့်ထပ်မံဖွင့်လှစ်ထားကြောင်းသိရသည် ။
ကျောက်မဲမြို့ခံ စစ်ရှောင်ကူညီရေးကော်မတီ မှ စီမံခန့်ခွဲရေးအပိုင်းကို တာဝန်ယူဆောင်ရွက်ပေးလျှက်ရှိပြီး UN အပါအဝင် မန္တလေး ၊ လားရှိုး ၊ ပြင်ဦးလွင် စသည့် နယ်မှ အလှူရှင်များထံမှ အထောက်များအပံ့ရထားရှိ ကြောင်း ဦးတင်မောင်သိန်းကပြောပါသည် ။
