သျှမ်းပြည်မြောက်ပိုင်းမူဆယ်မြို့နယ် မိုင်းပေါ်အုပ်စုမှာ မိုင်းပေါက်ကွဲလို့ မူလတန်းကျောင်းသား ၁ ဦး သေဆုံးပြီး ၅ ဦး ဒဏ်ရာရရှိခဲ့ပါတယ်။
ဒီဇင်ဘာလ ၁၉ ရက်နေ့ မွန်းလွဲ ၃ နာရီခွဲကနေ ၄ နာရီအကြား ကျောင်းဆင်းချိန်မှာ မိုင်းပေါက်ကွဲခဲ့တာ ဖြစ်ပါတယ်။
ကလေးတွေက ၀မ့်ဟိုနားရွာကနေ ကျောင်းလာတက်တယ်လေ။ မိုင်းက ကျောင်းနဲ့ရွာကြား လမ်းဘေးမှာ မြုပ်ထားတာ။ မိုင်းတွေ့တဲ့ကလေးက မောင်တန်မိုင် (အသက် ၁၃ နှစ်) ။ သူ့သူငယ်ချင်းတွေကို ခေါ်ကြည့်ခိုင်းတော့ မောင်အောင်လင်းထွန်း (အသက် ၁၂ နှစ်) က ခဲနဲ့သွားပစ်ပေါက်တာ မိုင်းပေါက်သွားတယ်။ ၃ တန်းကျောင်းသား လေး အောင်လင်းထွန်းပွဲချင်းပြီးသေသွားတယ်။ မောင်တန်မိုင် က ခြေထောက် နဲ့ဗိုက်တွေမှာဒဏ်ရာရသွားတယ်။ သူတို့သူငယ်ချင်း ၃ ယောက် ဖြစ်တဲ့ ခိုင်လင်းထွန်း ၁၀ နှစ် ဒုတိယတန်း၊ စိုင်းအိုက်အုံး – ၁၀ နှစ် ဒုတိယတန်း ၊ မိုင်းအိုက်ထွန်း- ၈ နှစ် ပထမတန်း ကလည်း ဗိုက်တွေ ခြေထောက်တွေမှာ အသီးသီး ထိခိုက်ဒဏ်ရသွားတယ် – ဟု မူစယ်မြို့သား စိုင်းဟင်လိတ်ကပြောပါတယ်။
ဒဏ်ရာရတဲ့ကလေး ၄ ယောက်ကို လားရှိုးဆေးရုံမှာ ၂ ယောက်၊ မူဆယ်ဆေးရုံမှာ ၂ ယောက် တက်ရောက် ကုသမှုခံယူနေတယ်လို့သိရပါတယ်။ ဒီမနက်မှာတော့ မူဆယ်ဆေးရုံက ကလေး ၂ ယောက်ကို လားရှိုးဆေးရုံ ကိုဆက်လက်ပို့ဆောင်လိုက်ပြီလို့သိရပါတယ်။
မူဆယ်မြို့သူ ပါ့နန်းကတော့ – ဒီ ၁ နှစ် ၂ နှစ်အတွင်းမိုင်းပေါ်ဘက်မှာ မိုင်းကွဲတာ ဗုံးပေါက်တာခနခနဖြစ်တယ်။ ၃-၄ ကြိမ်ထက်မနည်းတော့ဘူး။ ထိခိုက်ဒဏ်ရာရတာ သေတာတွေလည်းမနည်းတော့ဘူး- လို့ပြောပါတယ်။
မိုင်းပေါ်ဒေသမှာ အစိုးရတပ်၊ KIA တပ်၊ TNLA တပ်ဖွဲ့ နဲ့ ဌာနေပြည်သူ့စစ်တပ်ဖွဲ့ တို့လှုပ်ရှားသွားလာကြ ပေမယ့် ဘယ်သူ့လက်ချက်ဆိုသည်ကိုတော့ ဖေါ်ထုတ်နိုင်ခြင်းမရှိသေးပေ။
