RCSS/SSA အနေဖြင့် သတ်မှတ်ထား သောနေရာမှ အပ နိုင်ငံရေးဆွေးနွေးပွဲ မပြုလုပ်ဖို့ တောင်ကြီးအခြေစိုက် အရှေ့ပိုင်းတိုင်းစစ်ဌာနချုပ် တိုင်းမှူး ရပခတိုင်းရုံးကနေ အကြောင်းကြားစာတစောင်ကို ဒီဇင်ဘာလ ၁၉ ရက်နေ့နေ့စွဲနဲ့ RCSS/SSA ထံပေးပို့လိုက်ပါတယ်။
လင်းခေးမြို့မှာ သျှမ်းအမျိုးသားအဆင့်နိုင်ငံရေးဆွေးနွေးပွဲကျင်းပဖို့ နို၀င်ဘာလ ၂၇ ရက် JICM အစည်းအဝေးမှာ သဘောတူဆုံးဖြတ်ခဲ့ကြကြောင်းနဲ့ ဒီဇင်ဘာလ ၁၁ ကနေ ၁၅ ရက်နေ့အထိ CSSU ဦးဆောင်မှုနဲ့ တောင်ကြီးမှာပြုလုပ်သွားတဲ့အကြိုဆွေးနွေးပွဲလို ဆွေးနွေးပွဲမျိုး နောက်နောင်မှာ ခွင့်ပြုထားတဲ့နေရာ သတ်မှတ်တဲ့နေရာမှာသာ ပြုလုပ်သွားဖို့အကြောင်းကြားတယ်လို့ပါရှိပါတယ်။
အခုလိုတားဆီးပိတ်ပင်မှုမျိုးနဲ့ပတ်သက်ပြီး ဗိုလ်မှူးကြီးစိုင်းဦးကတော့ – ကျနော်တို့ဒီလူထုတွေ့ဆုံပွဲက ၂၁ ရာစုပင်လုံညီလာခံ မှာတင်ပြဖို့အတွက် အချက်အလက်တွေ ကိုစုဆောင်းခြင်းဖြစ်တယ်။ ပြည်သူလူထု အကြံဉာဏ် ကိုယူနေတာပါ ။ တိုင်းပြည်အတွက် ငြိမ်းချမ်းရေးဖြစ်စဉ် အတွက် အထောက်အကူ ဖြစ်စေပါတယ်။ အဲလိုဟန့်တားခံရခြင်း အားဖြင့် ကျနော်တို့ သျှမ်းလူမျိုးတင်သာမက တိုင်းရင်းသားတွေအားလုံးက တပ်မတော်အပေါ်ယုံကြည်မှု ကိုလျော့ပါးလာစေတယ်။ အမှန်ဆိုရင်ကျနော်တို့က ဒီနိုင်ငံရေးတွေ့ဆုံ ဆွေးနွေးပွဲကို လုပ်နေတာက ကျနော်တို့ ကဒီနိုင်ငံတည်ဆောက်ဖို့ ငြိမ်းချမ်းရေးတည်ဆောက် ဖို့ အတွက်လုပ်နေတာပါ – လို့ပြောဆိုလိုက်ပါတယ်။
လူထုတွေ့မှုပြုနေတဲ့အဖွဲ့ဟာ ၂၅ ရက်နေ့တောင်ကြီးမှာ ပြန်လည်တွေ့ဆုံမှာဖြစ်ပြီးတော့ လာမယ့်လမှာ လင်းခေးမြို့မှာပြုလုပ်မယ့် သျှမ်းအမျိုးသားအဆင့်နိုင်ငံရေးဆွေးနွေးပွဲအတွက် အချက်အလက်တွေစု ဆောင်းပြင်ဆင်ကြမှာဖြစ်ပါတယ်။
အမျိုးသားအဆင့်နိုင်ငံရေးဆွေးနွေးပွဲလုပ်ဖို့ အဆင့်သုံးဆင့် ပြင်ဆင်ရမှာဖြစ်ပါတယ်။ ပထမ အဆင့် လူထု နှင့် တွေ့ဆုံကာ အကြံအဉာဏ်ယူခြင်း၊ ဒုတိယ အဆင့် အမျိုးသားအဆင့်နိုင်ငံရေးဆွေးနွေးပွဲလုပ်ဖို့ အကြိုပြင်ဆင်ခြင်း၊ နောက်ဆုံးတတိယ အဆင့် ကတော့ (လင်းခေးမှာပြုလုပ်မယ့်) အမျိုးသားအဆင့်နိုင်ငံရေးဆွေးနွေးပွဲ ပြုလုပ်ခြင်း ဘဲဖြစ်ပါတယ်။
ယခုလို တပ်မတော်က ဟန့်တားထားသည့် အတွက် ဒုတိယ အဆင့်လုပ်နိုင်ဖို့ အခက်အခဲ ဖြစ်လာနိုင်တဲ့အပြင် တတိယ အဆင့်လုပ်ဖို့လဲ ခက်ခဲသွားနိုင်ကြောင်းနဲ့ နေပြည်တော်မှာ ကျင်းပ မယ့် ၂၁ ရာစု ပင်လုံညီလာခံ တတိယ အကြိမ် ကျင်းပ ဖို့ အဆင့်အထိ ဂယက်ရိုက်သွားနိုင်ကြောင်း သျှမ်းခေါင်းဆောင်များက သုံးသပ်ကြပါတယ်။
