သျှမ်းပြည်တောင်ပိုင်း နမ့်စန်မြို့ ၊ သျှမ်းပြည်အရှေ့ပိုင်း ကျိုင်းတုံမြို့နှင့် ကယားပြည်နယ်လွယ်ကော်မြို့တို့တွင် သျှမ်းအမျိုးသားအဆင့်နိုင်ငံရေးဆွေးနွေးပွဲအကြို လူထုတွေ့ဆုံပွဲများ ဒီဇင်ဘာလ ၁၉ ရက်က အောင်မြင်စွာ ကျင်းပနိုင်ခဲ့ကြောင်းသိရသည်။
သျှမ်းပြည်အရှေ့ပိုင်းကျိုင်းတုံမြို့တွင် မိုင်းပျင်းကျောင်းတိုက်တွင်ကျင်းပရာ မိုင်းပျင်း၊ မိုင်းဖြတ်၊ ကျိုင်းတုံ၊ မိုင်းခတ်မြို့တို့မှ ဒေသခံတရာခန့်တက်ရောက်ဆွေးနွေးခဲ့ကြကြောင်း ဆွေးနွေးပွဲဖြစ်မြောက်ရေးကော်မတီတွင် ပါ၀င်သည့် လူငယ်ခေါင်းဆောင် စိုင်းဆုကပြောသည်။
“သျှမ်းပြည်အရှေ့ပိုင်းမှာ ကျနော်တို့ ၃ နေရာလုပ်မယ်လို့ကြားတယ်။ နောက်ပိုင်း နှစ်နေရာဘဲ လုပ်မယ် လို့ကြားတယ်။ မိုင်းယန်းမှာ က မလုပ်ဖြစ်တော့ဘူးပြောတယ်။ ပင်လုံမှာ တပ်မတော်က စစ်အင်အား နဲ့ လာရောက်ဟန့်တားလို့ လူထု စိုးရိမ်ကြောက့်ရွံ့နေလားမသိဘူး။ ကျိုင်းတုံမှာလည်း ၁၀၀ လောက်ဘဲလာတယ်။ စစ်ထောက်လှမ်းရေးလဲလာတယ်။ လွတ်လပ်မှုတော့မရှိဘူး” – ဟုသျှမ်းအမျိုးသား အဆင့်နိုင်ငံရေးဆွေးနွေးပွဲအတွက် ကျိုင်းတုံမြို့ လူထုတွေ့ဆုံပွဲတွင် ပါ၀င်သည့် စိုင်းယီ့လုံ က ပြောသည်။
အလားတူ နမ့်စန်မြို့ဝါဆိုကျောင်းတိုက်တွင်ကျင်းပသော လူထုတွေ့ဆုံပွဲသို့ မိုးနဲ၊ ကျိုင်းတောင်း၊ ခိုလမ်၊ နမ့်စန်တို့မှ ဒေသခံလူထု ၂၀၀ ခန့်တက်ရောက်ခဲ့ကြောင်း၊ စစ်ဘက်လုံခြုံရေး စရဖ အရာရှိ စစ်သည် အချို့လည်း လာရောက်သတင်းထောက်လှမ်းကြောင်း တက်ရောက်သူများပြောပြချက်အရသိရသည်။
“ဒေသခံလူထု တော်တော်များများဆွေးနွေးတင်ပြသွားပါတယ်။ အဓိက တန်းတူခွင့် နဲ့ ကိုယ်ပိုင်ဆုံးဖြတ်ပိုင်ခွင့်၊ မြေယာသိမ်းတဲ့ ကိစ္စ ၊ယာဘကြောင့်လူငယ်တွေပျက်စီးရခြင်း စတာတွေလည်းပါ၀င်ပါတယ်။ အာဏာပိုင်တွေဘက်ကလာပြီးတော့ ဟန့်တားတာတွေတော့မရှိပါဘူး ”- ဟု ကျားခေါင်းပါတီ မိုးနဲမြို့နယ်ပြည်နယ်လွှတ်တော်ကိုယ်စားလှယ် စိုင်းမွန်းလိန်ကပြောသည်။
ကယားပြည်နယ် လွယ်ကော်မြို့တွင်လည်း သျှမ်းလူထုနှင့်တွေ့ဆုံပွဲ ပြုလုပ်ခဲ့ပါသည်။
လူထုနှင့်တွေ့ဆုံရေးအဖွဲ့သည် ဒီဇင်ဘာလ ၂၄ ရက်နေ့အထိ ဒေသခံလူထုနှင့်တွေ့ဆုံကာ သဘောထားဆန္ဒများကောက်ယူသွားမည်ဖြစ်ကြောင်းသိရသည်။ ဒီဇင်ဘာလ ၂၅ ရက်နေ့တွင် တောင်ကြီးမြို့တွင်တွေ့ဆုံကာ အချက်အလက်များစုဆောင်းပြီး လာမည့် ဇန္နဝါရီလအတွင်း လင်းခေးမြို့တွင် ကျင်းပမည့် သျှမ်းအမျိုးသားအဆင့်နိုင်ငံရေးဆွေးနွေးပွဲတွင် ဆွေးနွေးကြမည်ဖြစ်ကြောင်း၊ ရရှိလာသည့် သဘောတူညီချက် နိုင်ငံရေးလိုအပ်ချက်များအား လာမည့်နှစ် ၂၀၁၈ နှစ်ဦးပိုင်းတွင် နေပြည်တော်တွင် ကျင်းပမည့် ၂၁ ရာစု ပင်လုံညီလာခံ တတိယ အကြိမ်တွင် သျှမ်းအမျိုးသားနိုင်ငံရေးလိုအပ်ချက်အဖြစ် တင်ပြဆွေးနွေးသွားမည်ဖြစ်ကြောင်းသိရသည်။
