သျှမ်းပြည်တောင်ပိုင်း ၇ မြို့နယ်မှ သျှမ်းစာပေယဉ်ကျေးမှုအသင်း စည်းလုံးညီညွတ်ရေးအတွက် တွေ့ဆုံဆွေးနွေး

0

သျှမ်းပြည်တောင်ပိုင်းရှိ မြို့နယ် ရ မြို့နယ်မှ သျှမ်းစာပေနှင့်ယဉ်ကျေးမှုအသင်း ၇ ဖွဲ့ စုပေါင်းကာ လူမှုရေးလုပ်ငန်းများ ပူးပေါင်းဆောင်ရွက်ရန်နှင့် ဒေသတွင်းလူထုအရေး ပူးပေါင်းဆောင်ရွက်ရန်တွေ့ဆုံဆွေးနွေးခဲ့ကြကြောင်းသိရသည်။

ဒီဇင်ဘာလ ၁၃ ရက်နေ့က သျှမ်းပြည်တောင်ပိုင်း လင်းခေးခရိုင် မိုင်းပန်မြို့နယ် ဦးစိုင်းပီးအိမ်တွင်ကျင်းပရာ မြို့နယ်အသီးသီးမှ သျှမ်းစာ/ယဉ် ကိုယ်စားလှယ် ၃၀ ထက်မနည်းတက်ရောက်ခဲ့ပါသည်။

တွေ့ဆုံဆွေးနွေးမှုတွင် ထိုင်းနိုင်ငံသို့သွားရောက်အလုပ်လုပ်ကိုင်နေသော သျှမ်းပြည်သားများ နေရပ်ပြန်ပါက အလုပ် အကိုင်ရရှိရေး နေရာထိုင်ခင်းအဆင်ပြေလွယ်ကူစေရေး နိုင်ငံသားမှတ်ပုံတင် ရရှိရေး အိမ်ထောင်စုစာရင်းရရှိရေး အတွက် တတ်နိုင်သည့်ဘက်မှ ကူညီဆောင်ရွက်သွားကြရန် သဘောတူခဲ့ကြကြောင်း သိရသည်။

“ထိုင်းနိုင်ငံရောက် ကျနော်တို့အမျိုးတွေ ရွာပြန်ရင် အလုပ်အပိုင်မရှိမှာကို အားမငယ်ပါနဲ့။ ကျနော်တို့ ဘက်က ကူညီဖို့ အခုပြင်ဆင်နေပါတယ်။ နေရာထိုင်ခင်းကအစ အလုပ်အကိုင်တွေရရှိရေး တွေအတွက် ကူညီထောက်ပ့ံမှုပေးဖို့ သျှမ်းပြည်နယ်အစိုးရကို စာရေးသားတင်ပြဖို့စီစဉ်နေပါတယ်”- ဟု မိုင်းပန်မြို့ သျှမ်းစာပေယဉ်ကျေးမှုအသင်း အတွင်းရေးမှူး က ပြောဆိုသည်။

ထိုအကြောင်းအချက်များအပြင် ရ မြို့နယ် သျှမ်းစာပေယဉ်ကျေးမှုအသင်းက အသင်းအမှတ်တံဆိပ်တခုတည်းအသုံးပြုကြရန် ၊ သျှမ်းနှစ်သစ်ကူးပွဲတော်အပါအဝင် ရိုးရာပွဲတော်များကို တနေရာပြီးတနေရာ အလှည့်ကျ စုပေါင်း ပြီး ပြုလုပ်ကျင်းပသွားရန်ကိုပါ ဆွေးနွေးနိုင်ခဲ့ကြောင်းသိရသည်။

စည်းလုံးညီညွတ်ရေးအတွက် ဆွေးနွေးပွဲပြုလုပ်သည့် သျှမ်းပြည်တောင်ပိုင်း မြို့နယ် ရ ခုမှာ လင်းခေး၊ မိုင်းပန်၊ မောက်မယ်၊ မိုးနဲ၊ ပန်လျန်းဆိုင်၊ ဟိုမိန်း၊ ကျိုင်းတောင်း မြို့နယ်များဖြစ်ကြသည်။ ယခုတွေ့ဆုံမှုမှာ ဒုတိယအကြိမ်ဖြစ်ပြီး ပထမ အကြိမ်စတင်တွေ့ဆုံမှုမှာ လင်းခေးမြို့နယ် နားကုန်းအုပ်စုတွင် ဒီဇင်ဘာလ ၄ ရက်နေ့က ကျင်းပသော ၂၁၁၂ ခုနှစ် သျှမ်းနှစ်သစ်ကူးကြိုဆိုပွဲတွင် ဖြစ်ကြောင်းသိရသည်။

SHARE

LEAVE A REPLY

Please enter your comment!
Please enter your name here