SSPP/SSA အခြေချရာသို့ PSLF/TNLA ၀င်ရောက်မှုကြောင့် နမ္မတူမြို့နယ်အတွင်း ၂ ဘက်တိုက်ပွဲဖြစ်

0

သျှမ်းပြည်မြောက်ပိုင်း နမ်တူမြို့နယ် မိုင်းရင်အုပ်စုမှာ တအာင်းအမျိုးသားလွတ်မြောက်ရေး တပ်မတော် TNLA နဲ့ သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA တို့တို်က်ပွဲဖြစ်ပွါးခဲ့ပါတယ်။

ဒီဇင်ဘာလ ၅ ရက် ည ၉ နာရီကနေ မနက် ၁ နာရီအထိ TNLA နဲ့ SSPP တို့အကြားတိုက်ပွဲ ၂ ကြိမ်ဖြစ်ပွါးခဲ့ပါတယ်။

“တအာင်းတပ်တွေ မိုင်းရင်ထဲအထိ၀င်လာတယ်။ စျေးတွေထဲဝင်လာတယ်။ ဒေသခံလူထုကိုဆင့်ခေါ်တယ်။ သန်းခေါင်စာရင်းတွေကောက်တယ်။ သန်းခေါင်စာရင်းမပေးမနေရ။ စာရင်းအမှန်ကိုပေးရမယ်လို့ ပြောတယ်။ သန်းခေါင်စာရင်းမှာနာမည်မပါတဲ့သူကို တောတောင်တွေထဲမှာသွားစစ်ဆေးတွေ့မိရင် RCSS/SSA ရဲ့လူဆိုပြီး သတ်မှတ်ခံရမယ်ဆိုပြီး ခြိမ်းခြောက်ပြောဆိုလာတယ်။ နောက်ဆုံး ကျနော်တို့ကို ဟိုမသွားရ ဒီမသွားရ တားဆီးတာတွေရှိလာတယ်။ ကျနော်တို့ ၀မ်းရေးအခက်အခဲဖြစ်လာတယ်။ အခုလိုတိုက်ပွဲထပ်ဖြစ်တော့ ပိုဆိုးတော့တာပေါ့။ အခြေအနေတင်းမာနေရင် လယ်ယာခြံတွေပစ်ပြီး ထွက်ပြေးရဦးမယ်ကျနော်တို့ ” -လို့ ဒေသခံ စိုင်းဟန်ကပြောပါတယ်။

TNLA နဲ့ SSPP တို့ဟာ ပြီးခဲ့တဲ့လကတည်းက ၂ ဘက်တပ်တွေ စစ်ရေးတင်းမာနေခဲ့တာဖြစ်တယ်လို့ SSPP/SSA စစ်မြေပြင်တာဝန်ကျ အရာရှိကပြောပါတယ်။

“ပြီးခဲ့တဲ့နို၀င်ဘာလ ၉ ရက်နေ့ကတည်းက SSPP လှုပ်ရှားနယ်မြေထဲကို TNLA က တအာင်းပြည်နယ်အတွင်းဆိုတဲ့ စာသားပါရှိတဲ့ မူးယစ်ဆေးဝါးတိုက်ဖျက်ရေး ပိုစတာကြီးတွေစိုက်ထူပြီး ၀င်ရောက်လှုပ်ရှားတယ်။ ကျနော်တို့ဘက်ကတော့ တမြေတည်းနေတဲ့ တိုင်းရင်းသားညီအကိုအချင်းချင်းမို့ တိုက်ပွဲမဖြစ်ချင်ဘူး။ တတ်နိုင်သလောက်ရှောင်တယ်။ နမ့်ဆွန်ချောင်းမြောက်ပိုင်းသူတို့နေမယ်။ ချောင်းတောင်ဘက်ပိုင်းကျနော်တို့နေမယ် ဆိုပြီးသူတို့က စပြီးသတ်မှတ်တယ်။ နောက်ဆုံးသူတို့ရဲ့ သတ်မှတ်ချက်ကို သူတို့ချိုးဖောက်ပြီး ကျနော်တို့ဘက်ကိုကျူးကျော်လာတယ်။ ကျနော်တို့ဆီဦးတည်လာလို့ တိုက်ပွဲဖြစ်ရတာဖြစ်တယ်” – ဟု SSPP/SSA စစ်မြေပြင်တာဝန်ကျ အရာရှိတဦးကသျှမ်း သံတော်ဆင့်ကိုပြောပါတယ်။

တိုက်ပွဲမှာ ၂ ဘက်ထိခိုက်ဒဏ်ရာရမှုအနည်းငယ်ရှိခဲ့ပြီး TNLA ဘက်က ၂ ဦးကျဆုံးခဲ့တယ်လို့ SSPP/SSA ပြန်ကြားရေးအရာရှိကလည်းပြောပါတယ်။

TNLA/PSLF ဒုတိယဥက္ကဌ တာ့ဂျုတ်ဂျားကတော့ SSPP/SSA ခွင့်ပြုချက်နဲ့ အဲဒီဒေသထဲကို ဝင်ရောက်ဆိုင်းဘုတ်ထောင်တယ်လို့ ပြောကြောင်း မဇ္ဈိမသတင်းဌာနကဖော်ပြထားပါတယ်။

TNLA နဲ့ SSPP/SSA တို့ဟာ ၀ တပ်ဖွဲ့ဦးဆောင်တဲ့ မြောက်ပိုင်းမဟာမိတ်တပ်ဖွဲ့ FPNCC ထဲမှာပါ၀င်ထားပြီး တော့ NCA စာချုပ်လက်မှတ်ရေးထိုးဖို့ လက်မခံဘဲ နိုင်ငံရေး တိုက်ရိုက် ဆွေးနွေးရေးဖို့ နည်းလမ်း အသစ်ရှာနေတဲ့ အဖွဲ့ဖြစ်ပါတယ်။

Photo by Citizen journalist

SHARE

LEAVE A REPLY

Please enter your comment!
Please enter your name here