သျှမ်းပြည်မြောက်ပိုင်း ကွတ်ခိုင်မြို့နယ် မိုင်းယုအုပ်စုတွင်ကျင်းပသော သျှမ်းနှစ်သစ်ကူးပွဲတော်ဒုတိယညတွင် သေနတ်ပစ်ဖောက်မှုကြောင့်ဒေသခံလူထု ထိတ်လန့်ကာ ပွဲပျက်သွားကြောင်း သိရသည်။
နို၀င်ဘာလ ၁၈ ရက်နှင့် ၁၉ ရက်တို့တွင် ကျင်းပသော မိုင်းယုအုပ်စု သျှမ်းနှစ်သစ်ကူးပွဲတော်၌ ပွဲတော်ဒုတိယညတွင် လက်နက်ကိုင်အဖွဲ့တဖွဲ့မှ သေနတ်ပစ်ခတ်ရာ ပွဲလှန့်ကာ စောစီးစွာပွဲပျက်ခဲ့ကြောင်း မိုင်းယုဒေသခံ စိုင်းလျောဝ်စတ့် က သျှမ်းသံတော်ဆင့်အားပြောသည်။
“၉ နာရီမထိုးခင်တုန်း တအာင်းလက်နက်ကိုင်တပ်ဖွဲ့တဖွဲ့ မိုင်းယုနဲ့ ပန်လော့တွေမှာရှိတဲ့ ငါးဖမ်းဂိမ်း လောင်းကစား တွေကိုဖမ်းဆီးရှင်းလင်းဖို့ ဆိုပြီး မိုင်းယုနဲ့ ပန်လော့ကြားက တံတားမှာစောင့်တယ်။ ရွာကနေပွဲလာတဲ့သူတွေ ပြန်မယ်ဆိုတော့လည်းပေးမပြန်ဘူး။ အဝင်အထွက်အားလုံးပိတ်ထားလိုက်တယ်။ ဆိုတော့ရွာပြန်မယ့် လူတွေ မပြန်နိုင်ဘဲ ပွဲလုပ်နေတဲ့ ဇေယျာသီရိမွေတော် မိုင်းယု ဘုန်းကြီးကျောင်းဆီ ကိုပြန်လာနားရတယ်။ အဲ့နောက်ပိုင်းမကြာမှီမှာဘဲ သေနတ်ပစ်သံကြားလို့ ပွဲလှန့်ပြီး လူတွေအသီးသီး အိမ်ပြန်ကုန်ကြတယ်။ ပွဲလဲ တခါတည်း စဲသွားတယ်။ ည ၉ နာရီမှာ ပွဲပျက်သွားတယ်။ ဘယ်အဖွဲ့က ပစ်သလဲတော့မသိဘူး။ ပန်လော့ဘက်က ငါးမန်းဂိမ်းလောင်းကစားဝိုင်း ၂ ၀ုိင်းရှိတာတဝိုင်းဘဲဖမ်းသွားတယ်။ မိုင်းယုဘက်မှာကျတော့ လာဖမ်းတာမတွေ့ဘူး ”- ဟု စိုင်းလျောဝ်းစတ့်က ပြောသည်။
အဆိုပါအခင်းဖြစ်ပွါးမှုတွင် သေနတ်ပစ်ခတ်သံ ၁၀ ချက်မက ကြားခဲ့ရကြောင်း၊ မည်သည့်အဖွဲ့က ပစ်ခတ်သည်ကိုတော့အသေအချာမသိရကြောင်း မိုင်းယုဒေသခံများကပြောဆိုသည်။
မိုင်းယုအုပ်စုသည် ကွတ်ခိုင်မြို့နှင့် ၁၉ မိုင်ခန့်အကွာတွင် တည်ရှိပါသည်။
Photo-ပွဲလှန့်ပြီး အိမ်ပြန်ကြသည့် ရွာသားများ