လင်းခေးမြို့တွင် ၂၁၁၂ ခုသျှမ်းနှစ်သစ်ကူးအထိမ်းအမှတ် သျှမ်းဘာသာစာမေးစာပြန်ပွဲ ကလေး၊ လူကြီး ရာဂဏန်းဝင်ရောက်ဖြေဆို

0

သျှမ်းပြည်တောင်ပိုင်း လင်းခေးခရိုင် လင်းခေးမြို့တွင် ၂၁၁၂ ခုနှစ် သျှမ်းနှစ်သစ်ကူးပွဲတော် အထိမ်း အမှတ်အဖြစ် သျှမ်းစာပေယဉ်ကျေးမှုကော်မတီမှ သျှမ်းစာပေ နှင့် ဗုဒ္ဓဘာသာဆိုင်ရာ ဗဟုသုတ စာမေးစာပြန်ပွဲ လူငယ်မောင်မယ် ၁၉၀ ၀င်ရောက်ဖြေဆိုခဲ့သည်ဟုသိရသည်။

လင်းခေးမြို့နယ်အတွင်းမှ ကလေး ၅၃ ဦးနှင့် လူကြီး ၁၃၇ ဦး စုစုပေါင်း ၁၉၀ မှာ နို၀င်ဘာလ ၁၂ ရက်နေ့က လင်းခေးမြို့ အထက ကျောင်းတွင် သျှမ်းစာပေဖွံ့ဖြိုးတိုးတက်ရေးအတွက် သျှမ်းစာပေ ဖြေကြားကြရာ အမှတ်အများဆုံးရရှိသူအား နို၀င်ဘာလ ၁၆ မှ ၁၈ ရက်နေ့အထိ ကျင်းပမည့် သျှမ်း နှစ်သစ်ကူးပွဲတော်တွင် ဆုပေးသွားမည်ဖြစ်ကြောင်း လင်းခေးမြို့ သျှမ်းစာပေနှင့်ယဉ်ကျေးမှုကော်မတီ ဥက္ကဌ ဆရာစိုင်းအောင်ခင်ကပြောသည်။

“ကျနော်တို့ ပညာရေးဌာနကထုတ်တဲ့ ဖတ်မှတ်စွမ်းရည် လိုမျိုး ဒါကျနော်တို့ လုပ်တာ ပထမဆုံး အကြိမ်လို့ လည်း ပြောလို့ရပါမယ်။ ကလေးလူကြီး ၁၉၀ ၀င်ရောက်ဖြေဆိုတာ အားရစရာတော့ ကောင်းပါတယ်။ ဗုဒ္ဓရာဇဝင်အကြောင်းမေးထားတယ်။ သျှမ်းစာပေပညာရှင်ကြီးတွေ အကြောင်းမေး ထားတယ်။ သျှမ်းနှစ်သစ်ကူးအကြောင်းနဲ့ပတ်သက်ပြီးမေးထားတယ်။ နောက်ပြီးတော့ကိုယ့်ဇာတိ လင်းခေးမြို့နဲ့ ပတ်သက်ပြီးမေးထားပါတယ်။ သျှမ်းစာပေယဉ်ကျေးမှုကော်မတီရဲ့ ပညာရေးပိုင်း ဆိုင်ရာကော်မတီတွေက ဦးစီးကြပ်မတ်သွားတာဖြစ်ပါတယ်”- ဟု ဆရာစိုင်းအောင်ခင်ကပြောသည်။

လက်ရှိတွင် အစိုးရပညာသင်ကျောင်း၌ သင်ကြားမှုမဏ္ဍိုင်မှာ မြန်မာစာဖြစ်နေသဖြင့် မြန်မာစာအပြင် မိခင်ဘာသာစာဖြစ်သော သျှမ်းစာပေ၊ ကမ္ဘာသုံးဖြစ်သော အင်္ဂလိပ်စာတို့ကိုပါ ဒေသတွင်းလူငယ်ထုတို့ ကျွမ်းကျင်တတ်မြောက်စေလိုသည့်ရည်ရွယ်ချက်ဖြင့် သျှမ်းစာပေဖြေကြားမှုပြုလုပ်ပေးခြင်းဖြစ်ကြောင်း ဆက်လက်ပြောသည်။

ပညာတတ်လူငယ်များ၊ သံဃာတော်များ စုပေါင်းကာ ကလေးသူငယ်များအတွက် ဗုဒ္ဓဘာသာ ယဉ်ကျေးမှု အား စန်းဒေးစကူး ပုံစံဖြင့် လွန်ခဲ့သည့် ၂ – ၃ နှစ်မှစ၍ တနင်္ဂနွေနေ့ နေ့တိုင်းသင်ကြား ပို့ချ မှုလည်းရှိနေကြောင်း၊ အဆိုပါ ယဉ်ကျေးလိမ်မာ သင်တန်းကျောင်းက ကလေးလူငယ်များအား ဗုဒ္ဓ ဇါတ်နိပါတ်တော်များ၊ အဆို ဆုံးမ များ သင်ကြားပို့ချ ပေးမှု ကလည်း များစွာ အထောက်အကူပြု ကြောင်း ကျောင်းသားမိဘ တဦးဖြစ်သူ နန်းအေးပီးက လည်းပြောသည်။

Photo by Ying Hak

SHARE

LEAVE A REPLY

Please enter your comment!
Please enter your name here