ဖမ်းခံရ RCSS တပ်သား ၂ ဦးအား ရုံး ၄ ကြိမ် ချိန်းရာ တရားလိုတပ်မတော်ဘက် ၃ ကြိမ်ပျက်ကွက်

0

မိုင်းပြင်းမြို့နယ် မိုင်းပူးလုံအုပ်စုတွင် အဖမ်းခံရသော RCSS/SSA ၏ တပ်သား ၂ ဦးအား တရားရုံးတော်သို့ ၄ ကြိမ် ချိန်းဆိုသည့်အနက် တရားလိုဖြစ်သော အစိုးရတပ်မတော်သားများဘက်မှ သုံးကြိမ်ပျက်ကွက်ခဲ့သည် သိရသည်။

စတုတ္ထ အကြိမ် အဖြစ် တရားရုံးတော်က RCSS/SSA ၏ တပ်သား ၂ ဦးအား တနင်္လာနေ့ က ရုံးချိန်းဆိုကြောင်း၊ သို့သော် ဖမ်ဆီးတရားစွဲဆိုထားသည့် တပ်မတော်သား တရားလိုဘက်က ရုံးတော်သို့ ရောက်ရှိလာခြင်းမရှိကြောင်း၊ ဒီ့အတွက် နိုဝင်ဘာ ၂၀ ရက်နေ့ ရုံးထပ်မံ ချိန်းဆိုကြောင်း ကျိုင်းတုံမြို့ RCSS/SSA တာဝန်ကျ အရာရှိကပြောသည်။

ရုံးချိန်းရက်မှာ တရားလိုဘက်က ၁၃ ယောက်ရှိရမယ်လေ။ သူတို့ခေါ်ထားတဲ့ လူထု ၄ ယောက်ဘဲ လာတက်တော့ လူမစုံလို့ အမှုကြားနာလို့မရဘူးဆိုပြီး ထပ်ရွှေ့လိုက်တာ။ နို၀င်ဘာလ ၂၀ ရက်နေ့မှာ ရက်ချိန်းလိုက်တယ် – ဟု ကျိုင်းတုံမြို့မှ RCSS/SSA ၏ ဆက်သွယ်ရေးရုံးတာဝန်ကျ ကပြောသည်။

RCSS/SSA တပ်သား စိုင်းလုံနှင့် စိုင်းဆေလုံတို့အား ဂျူလိုင်လ ၂၅ ရက်နေ့က မိုင်းပြင်းမြို့နယ် မိုင်းပူးလုံအုပ်စုတွင်အစိုးရတပ်မတော်က ဖမ်းဆီးလိုက်သည်။

၄င်းတို့ ၂ ဦးအား လက်နက်လက်ဝယ်ထားရှိမှု၊ စကားပြောစက်လက်ဝယ်ရှိမှုနှင့် လူထုထံမှ အခွန် ကောက်ခံမှုဟုဆိုကာ မိုင်းဆတ်အခြေစိုက် တပ်မတော် စစ်ကြောင်း က ဂျူလိုင်လက ဖမ်းဆီးကာ တရားစွဲဆိုထား သည်။

စက်တင်ဘာလတွင်တကြိမ် အောက်တိုဘာလတွင် နှစ်ကြိမ် နို၀င်ဘာလ ၆ ရက်နေ့တွင်တကြိမ်စုစုပေါင်း ၄ ကြိမ် ရုံးချိန်းခဲ့သော်လည်း တရားလိုဖြစ်သောအစိုးရတပ်မတော်ဘက်က ၁ ကြိမ်သာရုံးတက်ကြားနာခဲ့ပြီး ၃ ကြိမ်မှာပျက်ကွက်သဖြင့် ယနေ့တိုင်ထပ်မံကြားနာနိုင်ခြင်းမရှိသေးပေ။

အစိုးရတပ်မတော် စွပ်စွဲပြောဆိုချက်မှာ ခိုင်မာမှုမရှိကြောင်း သျှမ်းပြည်တပ်မတော် ပြောခွင့်ရ ဒုတိယ ဗိုလ်မှူးကြီး စိုင်းမိဏ်းက ပြောသည်။

SHARE

LEAVE A REPLY

Please enter your comment!
Please enter your name here