သို့ – သျှမ်းသံတော်ဆင့်

မန်ပန်ဌာနေပြည်သူ့စစ်က ဒေသတွင်းလူထုကို တရွာတဦး တပ်သားသစ်ပို့ဆောင်ပေးဖို့ တောင်းလာ ပါတယ်။ ဒီလဆန်းပိုင်းက တောင်းဆိုလာတာပါ။

မိုင်းကျက်အုပ်စုမှာ ၁၃ ရွာရှိပါတယ်။ တပ်သားသစ်အတွက် တရွာကို လူတယောက် ပို့ပေးဖို့ ပြီးခဲ့တဲ့ ဂျွန်လ ၁၀ ရက်နေ့ကတည်း က တောင်းဆိုလာတာပါ။ မပို့မနေရစနစ်နဲ့ ၃ ရက်ဘဲအချိန်ပေးပြီး အမိန့်ပေးလာ တဲ့အတွက် ဒေသခံလူထုဟာ နေအိမ်မှာ သက်ကြီးရွယ်အိုတွေသာထားပြီး သားသမီးတွေကို မြို့တက်ပညာသင်ဖို့စေလွှတ်နေရပါတယ်။ တဖက်ကလည်း အဲလိုပို့လိုက်တော့ နေအိမ်မှာ လယ်ယာ လုပ်ငန်းခွင်ဝင်ဖို့ လူအင်အားမရှိတော့သလောက်ဖြစ်နေတာကြောင့် ရွာသားတွေအခက်တွေ့နေရပါတယ်။

ဥပမာ ၀မ့်ပုံရွာမှာဆိုရင် သားဖြစ်သူတွေ မြို့တက် ပညာသင် ကိုယ်ရင်ဝတ် သာသနာ့ဝန်ထမ်းတော့ အသက်အရွယ် ၅၀ ကျော်ဖခင်တွေကို သားအတွက်အစားထိုး ဖမ်းခေါ်သွားတာတွေလည်းရှိတယ်လို့ မိုင်းကျက်က စိုင်းလုံက ပြောပြပါတယ်။

ဂျွန်လ ၂၂ ရက်နေ့မှာလည်း မန့်မတ်က ဟန်ပန်ဘုန်းကြီးကျောင်း ကျောင်းထိုင်ဆရာတော်ကိုသူတို့လာဖမ်းသွားတယ်လို့ကြားသိရပါတယ်။ မန့်မတ်ရွာ ဖာဖင့်ပြည်သူ့စစ်တပ်စခန်းက ဗိုလ်ကြီးစိုင်းလွတ်က ၂၃ ရက်နေ့မှာ ဆရာတော်သင်္ဃန်းကိုချွတ် လူဝတ်လဲစေပြီး အခု စစ်သင်တန်းပေးနေတယ်လို့ ကြားသိရပါတယ်။ ဒီဒေသမှာ ဒီဆရာတော်က ၀ါတော်အရင့်ဆုံးဘဲ။ ဒီပြည်သူ့စစ်လုပ်ပုံကတော့ သာသနာကိုပါထိပါးလာနေတယ်။

တဖက်ကလည်း ပြီးခဲ့တဲ့ ၃ နှစ်လောက်က ၀မ့်နားပုံရွာက စိုင်းသန်းလူကို တပ်သားသစ် အဖြစ်ဖမ်းခေါ်သွားတယ်။ ဒီနှစ်ဆန်းပိုင်းမှာ နေရပ်ပြန်အနားယူတယ်။ နယ်စပ်ကသူ့အမျိုးတွေဆီအလည်သွားတုန်းပြည်သူ့စစ်ကပြန်လာခေါ်တော့ သူထွက်ပြေးတယ်လို့ စွပ်စွဲပြီး စိတ်မူမမှန်တဲ့ဖခင်ဖြစ်သူ လုံးလှကို ဖမ်းဆီးခေါ်ဆောင်သွားတယ်။ မေးမြန်း ရိုက်နှက်မှုတွေရှိလို့ အခုချိန်အထိ လုပ်ငန်းခွင်မဝင်နိုင်ဘူး။ ဒဏ်ရာဒဏ်ချက်တွေနဲ့ အနားယူနေရတုန်းဘဲ။ မူမမှန်တဲ့အထဲ။

ဒါမျိုးတွေရှိတော့ ကျနော်တို့ရွာသားတွေအနေနဲ့ ဘယ်သူ့ကိုအားကိုးရမလဲ။ အစိုးရတပ်မတော်လား … တားဖို့နေနေသာသာ လူသစ်စုဆောင်းဖို့တောင်အားပေးလိုက်သေးတယ်။ တခြားအဖွဲ့တွေကောက်သေးတာဘဲ။ ပြည်သူ့စစ်တပ်ဖွဲ့လဲကောက်လေ။ ဒီနယ်မှာလူအဲလောက်များတာ … လို့အားပေးသေးတယ်လေ။ ပြည်သူ့စစ်က လူများများကောက်ရင် သူလဲလိုသလောက်တောင်းနိုင်မှာကိုး။

လူသစ်ဘဲလား ။ မကဘူး။ လူလဲပေးရ။ လူကိုကျွေးဖို့ဆန်တွေ ရိက္ခာတွေကိုလည်း ကောက်တယ်။ ပိုက်ဆံလဲကောက်တယ်။ ၃ လပတ်က မိုင်းကျက်အုပ်စုအတွက် ၂၈ သိန်း တောင်းတယ်။တခြားအုပ်စုတွေကိုလည်းတောင်းတယ်။ အုပ်စုသေးရင် သိန်း ၂၀ ၊ များရင် သိန်း ၃၀ – ၅၀ အထိတောင်းတယ်။ ဘာလို့တောင်းတုန်းမေးတော့ သူတို့ကပြောတယ်။ ပြည်သူ့စစ်ဆိုတာပြည်သူလူထုကို ကာကွယ်ဖို့တဲ့။ ပိုက်ဆံရှာဖို့အချိန်မရှိဘူးတဲ့ တပည့်တွေများတယ်။ သူတို့ကိုကျွေးမွေးထောက်ပ့ံဖို့လိုတယ်တဲ့ – ကောင်းရော။

ကျနော်တို့မှာက လူလဲပေးရ ရိက္ခာလဲပေးရ ပိုက်ဆံလဲပေးရ လုပ်အားလဲပေးရ။ ဒီပုံကြည့်ရင် ဘယ်သူက ဘယ်သူ့ကို အကာအကွယ်ပေးနေသလဲ။ ဘယ်သူက ဘယ်သူ့ကိုကူညီထောက်ပ့ံနေတာလဲဆိုတာသိပါတယ်။

ကျနော်တို့လူထုအနေနဲ့ အရမ်းကျပ်တည်းနေပါပြီ။ လွတ်မြောက်ဖို့လမ်း ဘယ်မှာရှိနိုင်မလဲဆိုတာဘဲနေ့တိုင်းတွေးနေပါတယ်။

လွတ်မြောက်ဖို့လမ်းရှာနေဆဲ ….
မိုင်းကျက်က
စိုင်းလင်းလက်