တိုင်းရင်းသားကြားမှာ အထူးသဖြင့် သျှမ်းမှာ နိုင်ငံရေး၊ စစ်ရေး သတင်းတွေဆိုရင် အမျိုးသမီးသတင်းထောက်တွေဆီကို သတင်းမပေးချင်ကြတာတွေရှိနေသေးတယ်။ ဒါတွေဟာ အမျိုးသမီးသတင်းထောက်တွေအတွက် စိန်ခေါ်မှုတရပ်ဘဲ…..

ကနေ့ခေတ် Information Technology ခေတ်မှီတိုးတက် လာတာနဲ့အညီ မိမိကြိုက်နှစ်သက်ရာ ဘာသာရပ်ကို အင်တာနက် အွန်လိုင်း ကနေအလွယ်တကူ လေ့လသင်ယူနိုင်ပြီဖြစ်ပါတယ်။ ဒါကြောင့် သတင်းမီဒီယာလုပ်ငန်းမှာ အမျိုးသမီးတွေအတွက် များစွာအခွင့်အလမ်းရှိပါတယ်။

ကျမတို့ပြန်ကြည့်မယ်ဆိုရင် ၁၈၉၀ ခုနှစ်ကတည်းက အမျိုးသမီးတွေ သတင်းမီဒီယာ လောကထဲကို ဝင်ရောက်လာတာ တွေ့တယ်။ သို့ပေမယ့် ကနေ့အချိန်အထိ ကမ္ဘာမှာ သတင်းထောက်လုပ်နေတဲ့ အမျိုးသမီး တွေ ၃၆ % ဘဲရှိတယ်လို့ အမေရိကန် Poynter ဂျာနယ်မှာဖော်ပြထားတာတွေ့ရပါတယ်။

မြန်မာနိုင်ငံသန်းခေါင်စာရင်းအရ လူဦးရေ ၅၄ သန်းမှာ အမျိုးသမီး ၂၇ သန်းနဲ့ အမျိုးသား ၂၆ သန်း ရှိပါတယ်၊ အဲ့ဒီထဲမှာ မြန်မာနိုင်ငံ တဝှမ်းလုံးက တရားဝင်စာရင်းအရ အမျိုးသမီး သတင်းထောက် ၂၀၀ လောက်ဘဲရှိပါ တယ်။ ပြန်ကြည့်ရင်အဲ့ထဲမှာ တိုင်းရင်းသား အမျိုးသမီး သတင်းထောက် ဘယ်လောက်ဘဲရှိနို်င်မလဲ၊ သျှမ်းထဲမှာကော အမျိုးသမီးသတင်းထောက် ဘယ်လောက်ဘဲရှိနိုင်မလဲ၊ ဒါကြောင့် သျှမ်းအမျိုးသမီးတွေ သတင်းမီဒီယာ အလုပ်လုပ်နေတာ အနည်းငယ်ဘဲရှိနေသေးတယ်ဆိုတာကို တွေ့ရပါတယ်။

ဘယ်လိုအခက်အခဲတွေရှိသလဲလို့မေးလာရင် ဘယ်အလုပ်မဆို စ လုပ်ရင်တော့ အခက်အခဲဆိုတာရှိစမြဲပါဘဲ၊ ဗုဒ္ဓသာသနာ ထုံးတမ်းစဉ်လာအရ အမျိုးသမီးတွေဟာ အမျိုးသားတွေထက် ဘုန်းကံမမြင့်ဘူးလို့ ယုံကြည်ထားလို့ အမျိုးသမီး သတင်းထောက်တွေကြားထဲမှာလည်း သတင်းယူတဲ့ပိုင်းမှာ အနည်းငယ် အခက်ခဲရှိတယ်။ အမျိုးသမီး သတင်းထောက်ဆိုရင် သတင်းပေးသူတွေက သိပ်ပြီး သတင်းအချက် အလက်တွေ မဝေမျှချင်ဘူး။

ကျမ ကိုယ်တိုင်ကြုံဖူးတယ်။ သျှမ်းပြည်ထဲက လက်နက်ကိုင် တပ်ဖွဲ့တဖွဲ့က အရာတစ်ဦးက ကျမအမျိုးသားဆီကို သတင်းအချက်အလက်တွေပေးဖို့ ဖုန်းဆက်လာတယ်။ အမျိုးသား မအားလို့ ကျမဖုန်းကိုင်တယ်။ သတင်းအချက်အလက်တွေကို အမျိုးသားနဲ့တွေ့မှဘဲပေးတော့မယ် ဆိုတာရှိဖူးတယ်။ ဘာကြောင့်လဲဆိုတော့ အမျိုးသမီးတွေဟာ အမျိုးသားတွေလောက် မဆုံးဖြတ်တတ်ဘူး လို့ပြောပါတယ်။ ဒါမျိုးတွေဟာ အမျိုးသမီးသတင်းထောက်တွေအတွက် အခက်အခဲတခု စိန်ခေါ်မှု တခုဖြစ်နေပါတယ်။

နောက်တစ်ခုက ဥပမာ ဘာသာရေးပွဲတော်တွေလိုမျိုးပေါ့။ သတင်းယူဖို့ ဓါတ်ပုံတွေ ဗီဒီယိုကလစ်တွေ ယူဖို့ အရမ်းအခက်အခဲဖြစ်ရပါတယ်။

သို့ပေမယ့် မီဒီယာဟာ လူမှုရေး နိုင်ငံရေး ငြိမ်းချမ်းရေး ဖွံ့ဖြိုးတိုးတက်ရေးအစရှိအရေးပါတဲ့လုပ်ငန်းတွေ အတွက်အရေးပါတဲ့တံခါးတချပ်မို့ စိတ်ဝင်စားစရာ စိတ်လှုပ်ရှားစရာ မီဒီယာတံခါးတချပ်ကို အမျိုးသမီးထုရဲ့လက်နဲ့ လှစ်ဟကြည့်ဖို့ ဖိတ်ခေါ်တိုက်တွန်းချင်တယ်။ မီဒီယာလုပ်ငန်းဟာ ဘက်မလိုက်ရဘဲ အလယ်တည့်တည့်မှာနေပြီးဖော်ပြရတာမို့ ပျော်စရာကောင်းသလို အမှန်တရားဘက်ကအမြဲရပ်တည်ရတာမို့ ကုသိုလ်လည်းရနိုင်တဲ့အလုပ်တခုဖြစ်ပါတယ်။

ကနေ့ခေတ်မှာ အမျိုးသမီးတွေရဲ့နေရာဟာ အရင်ခေတ်ကလို မီးဖိုချောင်ထဲမှာဘဲ ခြံဝင်းထဲမှာဘဲ မဟုတ်တော့ပါဘူး။ ကျမတို့ မျက်စိပိတ် နားပိတ်ခံရတာ အတော်ကြာပါပြီ။ အင်တာနက်တံခါးကိုဖွင့်ပြီးတော့ ကိုယ်စိတ်ပါ၀င်စားရာကို အလွယ်တကူ လေ့လာနိုင်ပါပြီ။